منو
منی مجنون ائدن یاری-پریوش
منی مجنون ائدن یاری-پریوش،
طاقتیم کسیلدی، یئتیشدیم جانه.
بیر یول اؤلدور منی، چئویر باشینا،
بیرجه رحمین گل‌سین بو ناتوانه.
قوربان اولوم سنین گۆل یاناغینا،
آلا گؤزلرینه، دیل-دوداغینا،
ایسترم دولانیم سولو-ساغینا،
نئجه کیم، دولانیر شمعه پروانه.
کیم اولدو منیم تک بختی واژگون،
گؤزو قان‌لی یاش‌لی، حالی دیگرگون؟
هانی، نه اولدولار فرهاد و مجنون،
گلیدیلر فریادیم‌دان امانه؟
من اؤلن‌ده منی قویمون مزاره،
اودون یؽغین، وورون اونا شراره،
منی آتین، سیز چکیلین کناره،
قویون شعله‌لن‌سین، چک‌سین زبانه.
عاشق اولان خوف ائلمز بلادن،
اینجیمز یار ائدن جور و جفادن،
نباتی، ال چکه کیم‌دیر وفادن؟
قویموشام باشیمی من بو میدانه!