منو
گئنه گؤزوم دۆش‌دو بیر مه-جماله
گئنه گؤزوم دۆش‌دو بیر مه-جماله،
آغ اۆزون‌ده قارا مۆشکین خالی وار.
حلقه-حلقه اولوب زۆلفی-مۆشکینی،
لوحش-الله، عجب قددی-دالی وار!
یاناقلاری لاله، گؤزلر بادامی،
باغری‌می قان ائتدی لعلی-گۆل-فامی،
نه اولدولار، یارب، خسروی-نامی،
خسروو شیرینین مین مقالی وار.
دئ گل‌سین ساقییه، قورسون بساطی،
مرتّب ائیله‌سین بزمی-نشاطی،
تئز اولون، یان‌دیرین شمی-سیماتی،
دؤشیین مجلسه هر نه قالی وار.
صفحه-ی-رۆخساری بدری-منوّر،
دؤشنیب اۆستونه زۆلفی-معنبر،
دیشلرین میرواری، دهانی شککر،
لبلرینین عجب دادلی بالی وار.
گزسن عالمی جمله سرتاپا،
تاپیلماز بیر بئله سروی-دیلارا.
دیمز بیر مویینه، حق بیلیر، حاشا،
هر نه بو دۆنیانین ملکو، مالی وار.
یهرلیین گؤروم اسبی-گۆلگونی،
بیوفا گؤرورم چرخی-گردونی،
بیر دخی سئیر ائدیم طرفی-هامونی،
دیوانه کؤنلومون یۆز ملالی وار.
من دئدیم بس خانچوبانی جاوان‌دی،
بیر ایگید اوغلان‌دی، ببری-ژیان‌دی،
دئمه کی، قوجالیب، قددی کمان‌دی،
ایندی گؤردوم ساققالینین چالی وار.