گئنه باهار اولدو، آچیلدی گۆللر

گئنه باهار اولدو، آچیلدی گۆللر،
بۆلبول ناله‌سین‌دن توتولور قولاق.
گۆل گۆله سارماشیب، چیچک چیچه‌یه،
لاله جامی-جمع‌دن گتیریب سوراق.

سبزو خرم اولوب دشتو کوهسار،
دم وورار جنّت‌دن ترفی-جویبار،
ایاق گؤتور، ساقی، دورما اینتیظار،
منی بیر جام ایله ائیله تردماغ.

عالم‌ده خئیری شر نه اولسا حادث،
حؤکمی-یزدان اولور او امره باعث.
دئمه، زاهید، مئیه «اۆممولخبایس»
سن آنلایامماسان، یئری های اولاغ!

جفایه اۆز قویدو چرخی-بیوفا!
دردی-هیجره منی ائتدی مبتلا،
دوغرو سؤز، مختصر، من بختی-قرا
بیر دم یاره یئتیب تاپمادیم فراغ.

دئمه نباتینین یوخ‌دو دوامی،
جؤورومه تاب ائتمز، چکمز جفامی،
شاهید اولسون عالم جمله، تمامی،
نه قدر ایسترسن چک سینمه داغ!