منو
شئیدا بۆلبول، فغان ائتمه، غم یئمه
شئیدا بۆلبول، فغان ائتمه، غم یئمه،
بو گۆن، صاباح گۆل آچیلیر، یاز اولور.
عزیز ساخلا، غنیمت بیل وجودون،
وفاسی یوخ گۆلون، عؤمرو آز اولور.
دئگینن فرهادا، ائی محنت-پیشه،
شیرین‌دن اینجیمه، چال داشا تیشه.
عاشق معشوق آراسین‌دا همیشه
عشوه اولور، غمزه اولور، ناز اولور.
گئدر، جان‌دان چؽخار داغی-حسرتین،
آرتار گۆن‌دن-گۆنه شأنو شؤوکتین،
صبحی-وصله یئتر شامی-فیرقتین،
دیلیین، مطلبین هامی ساز اولور.
خدمه‌لر دورار ساغو سولون‌دا،
جواهیر بازوبند ایکی قودون‌دا،
فوواره‌لر ایشلر دایم گؤلون‌دا،
یاشیل باش‌لی اؤردک اولور، قاز اولور.
نباتی، سئومیشم بیر دیلسیتانی،
بیر سؤزو گۆلشکر، قؤنچه دهانی،
داها فاش ائیلمه سیرری-نیهانی،
عاشقین کؤنلون‌ده یۆز مین راز اولور.