سئودییم، گؤزلرین آلدی جانیمی

سئودییم، گؤزلرین آلدی جانیمی،
یاغی غمزه‌لرین قانیمی تؤکر،
دۆشسه هر کیم، دخی چؽخماز تورون‌دان،
گؤروم بو زۆلف‌دور یا کی، مشک-ی-تر؟

باشینا اؤرتوب‌دور تیرمه-ی-آبی،
قاشلاری باشلاییب نازو عتابی،
آمان، ساقی، گتیر اول مئیی-نابی،
بو جللادین قؽلینجین‌دان ال-حذر!

خجیل ائتدی اۆزون گۆلی-احمری،
اودا یاخدی زۆلفون مشکو عنبری،
شرمنده ائیله‌دی لؤلۆ گوهری،
گؤروم بو قؤنچه‌دیر، یا تۆنگ-شککر؟

بو نئجه نرگیزدیر، بو نئجه گؤزدور؟
بو نئجه لاله‌دیر، بو نئجه اۆزدور؟
بو نئجه شکردیر، بو نئجه سؤزدور؟
نه بئله لعل اولور، نه بئله گوهر.

نباتی، گۆل گلدی، آچیلدی لاله،
چکگینن بۆلبول تک گۆلشن‌ده ناله،
سنه قوربان، ساقی، دور، وئر پیاله،
سالگینن جانیما مئی‌دن بیر شرر.