اغیار اویانماسین!

آهسته، بولبولوم، اوخو، دلدار اویانماسین!
نازیله یاتمیش اول گولِ بی خار اویانماسین!
صبحون زامانی دردی جوشار بینوالرین
گیزلینده ناله چک، او جفا کار اویانماسین!
یوخدور غمیم، اویانسا او گول، آرزوم بودور
یانسین رقیبیم اودلارا، اغیار اویانماسین!
ای ماه پاره لر، بو گئجه یار گلمه ییب
سؤنسون فلکده ثابت و سیّار، اویانماسین!
سوزگون باخشلا یار سئویندیردی کؤنلومو
گؤرجک طبیبینی نئجه بیمار اویانماسین!
چشمینده فتنه وار او گولون، احتیاط ائدین
ممکن دئییل کی، مستِ خطا کار اویانماسین!
واحد، دئییلر ایندی ده میخانه لرده دیر
اؤز تؤبه سین کی، ائیله دی اینکار اویانماسین!