هیندویِ خال

آرتیریر حُسنونو گلدیجه رخِ دلداره خط
نئجه خوش اولماز ا گر آغ اوزره اولسا قاره خط
یوخ عجب، توتسا لبین دؤورونو خطین موُرتک
مایل اولموش من کیمی اول لعلِ شکّر باره خط
خطِ ریحانین روخون دؤورونده گؤرموش باغبان
سبزه دن چکمیش، اودور کیم، صفحهٔ گولباره خط
هیندوی خالین منیم تک مهر سالمیش روُیونا
کی، وطندن ائتمیش اول بیچاره نی آواره خط
مهرِ روخسارین توتاندان اول نیگارِ مهوشین
ائیله میش زولفو کیمی رؤوشن گونومو قاره خط
روزِ هیجران عرضِ حال ائتمک سنه ممکن دئییل
اول جهتدن یازمیشام کوُیوندا هر دیواره خط
واحدم، عشق آتشیله یاندی جانیم شمع تک
ائیله کی، گؤردوم چیخیب اول عارضِ گولناره خط