عاقل و فرزانه یم ایندی!

اؤز یاریما، بیلمه م، نییه بیگانه یم ایندی
اونسوز، ائله بیل کی، ده لی دیوانه یم ایندی
زولفونده اسیر اولدوغوم اول نازلی نیگارین
شمعِ روخونون دؤرونه پروانه یم ایندی
قان اولسون او مئی، بیرده اونو من اله آلسام
صد شوکر اولا، ترکِ رهِ میخانه یم ایندی
گؤردوکجه بو گول اوزلولرین چشمِ سیاهین
مئی سیزده همین ذؤقله مستانه یم ایندی
نه حُسنونه، نه وصلینه محتاجم او شوخون
محتاج بیر اول زولفِ پریشانه یم ایندی
مجنونو منم ایندیکی عصرین، هانی مجنون؟
دیللرده من اوندان داها افسانه یم ایندی
دیوانه ایدیم عشقده خالقین نظرینده
شوکر ائیله، کؤنول، عاقلِ و فرزانه یم ایندی
واحد، منه کافر دئمه، من عشق پرستم
نه طالیبِ مسجید، نه ده بوتخانه یم ایندی