شهریار

شاعریم، شهریاریم، افتخاریم، سئومه لی یاریم،
آی منیم شان و وقاریم،
گئتدین حیدر بابانین ذیروه سینی سیس دومان آلدی،
باغری قان لاله‌لرین شاختا ووروب، قار بوران آلدی،
سنی بیزدن زامان آلدی.

نه یامان گونده بو داغلی ائلین آرامینی آلدین،
اؤزون آق کورکی گئییب ائل باشینا قاره نی سالدین،
گؤیدن ایلهامینی آلدین.

اولما “اولدوز سایاراق” انتظاری باشه یئتیردین،
اولما سورگون یاشایان قارداشی قارداشه یئتیردین،
اولمایا آیری دوشن قاره گؤزی قاشه یئتیردین،
اللری باشه یئتیردین !

سن کی آذر ائلینی آتمازیدین، نولدوکی آتدین؟
سن کی “گؤزلر یاتاراق” یاتمازیدین، بس نیه یاتدین؟
سن کی یادلاره ائلین ساتمازیدین، اولمایا ساتدین؟
نییه اولدوز کیمی باتدین؟
کیمی دوتدون، بیزی آتدین؟

کؤنلوموزده ینه قات – قات یاتیشیب داغلار اوجالدی،
دییه بیللم اوجالیقدا ساوالاندان دا باج آلدی،
دن دوشوب ساچلارا زر تئللی گلین لرده قوجالدی،
نه بیلیم بلکه ده شیطان ینه دیرناغینی دیرناغینه چالدی،
نفاقین بذرینی اکدی،
هیجرانین طرحینی تؤکدی.

بیر زامان حافظین عطرین ائلیمیز سندن آلاردی،
زهره چنگ الده دوتوب صوبحه دک ایواندا قالاردی،
سن اوخوردون او چالاردی،
ظلماتین باغرینی یاردیقجا، گؤیه سس اوجالاردی،
عالمه لرزه سالاردی،
طبعی نین ساغری داشدیقجا، یئره اینجی جالاردی،
شعری شعر اوسته قالاردی.

بیر زامان سن ائلیمین نغمه قوشان بولبولو اولدون،
بیر زامان یوردوموزون عطر ساچان سونبولو اولدون،
گئتدین آذر ائلی نین بیر یارالی نیسگیلی اولدون،
“حقه دوغرو نه قارانلیق ایسه ائل مشعلی اولدون”،
دئدیگین حوری لره ایندی گئدیب سئوگیلی اولدون،
ابدیت گولو اولدون.

الی بوش گئتمه‌دین آنجاق، ائلیمیزدن یاز آپاردین،
سن ادب باغچاسی نین گول چیچکیندن ناز آپاردین،
حوری لر بزمینه سؤزلو سینه ن ایچره ساز آپاردین،
شوریله شهناز آپاردین،
دئمیرم چوخ، آز آپاردین.

نئجه سن سیز یاشاسین ائل لرین اوغروندا جوشانلار،
کیمدن ایلهامینی آلسین حایاتا نغمه قوشانلار،
کلمه‌لر له دوتوشانلار،
گئجه – گوندوز چالیشانلار،
چالیشارکن آلیشانلار.

سن گئدن دن، ادبیات باغی نین گول لری آغلار،
ساری سونبول لری آغلار،
اولکه میز یاسه باتاندان، سونا بولبول لری آغلار،
کوکره‌ییب قانلی آراز، کور چایی نین سئل لری آغلار،
عاشیقین گؤزلری آغلار،
سازینین سؤزلری آغلار،
موغانین دوزلری آغلار،
اوتای آغلار، بوتای آغلار،
ماوی گؤی لرده آی آغلار.

سنده دستانینی قوشدون او ایگید شانلی سهنده،
باشی توفانلی سهنده،
دوندو حیدربابانین قصه سی دستانلی سهنده،
اوره یی قانلی سهنده،
ده لی جیرانلی سهنده،
یئنی دن داردا قالیب، سانکی بیر اصلاندی، باغیردی،
داغلانار کن اوره یی داغلاری امداده چاغیردی.

قوجا حیدربابامیز داغلاناراق، اولدو دایاق سیز،
اوبا سسدن دوشره ک، قالدی اورک لرده قولاق سیز،
ساری سونبول لرینی شاخدا ووروب بیچدی اوراق سیز،
اود دوتوب یاندی اوجاق سیز.

آرازین آیناسی کاسلاندی ینه غمله یاناشدی،
دوشلریندن ساوالان میثلی سهندین سودو قاشدی،
ینه غم لر قاطاری توزلو یاناقلاردا ایز آشدی،
گؤزلرین کاسه سی داشدی،
سئل اولوب باشلاری آشدی،
قارا یئل اسدی خیالین آتی دوز یولدادا چاشدی.

آمما حیدربابانین شهرتی دونیایا یاییلدی،
شهریار باتدی سا، یوخ عیبی، یاتان گؤزلر آییلدی،
ایل لر آی سیز یاشادی اؤلدوکی اولدوزلو ساییلدی،
اوزو گئتدی آدی قالدی،
آغزیمیزدا دادی قالدی.

دئدی حیدربابایا، دونیا یالان دونیادی آنجاق،
شهریارداندا اثر قالسا، قالار بیر آدی آنجاق،
او آدی اولماز اونودسون وطنین اولادی آنجاق.

باشینا آند ایچر ائل لر،
اونا مسکن دی کونول لر،
پایلایار عطرینی گول لر،
آپارار هر یانا یئل لر،
سسینه سس قوشو سئل لر.

قیرا زنجیرینی اصلانلاریمیز قالمایا داردا،
جوشا غیرت قانی بلکه بو سویوق قانلی داماردا،
یاشایاق شانلی باهاردا،
محو اولا شاخدادا قاردا.

کاروانین باشچیلینی چالدی اجل چنگی آپاردی،
او گئنیش روحونا دونیا قفسی بیلدی کی داردی،
آخ نه توفان، کی ادب باغچاسی نین ایچره قوپاردی،
اوکی اولدوزلارا سوز اینجی سی مین غمزه ساتاردی.

سوزه ن اولدوزلارا دوندو،
عومرونون مشعلی سوندو.

او همان سلطان ایدی خدمته چکمیشدی صبانی،
طی ائدن کون و مکانی،
دوگه سلطان ریاضی قاپوسون صبح زامانی،

تاپا علمین آتاسین سیرده اندیشه باغیندا،
اونا مین نکته نی آیدینلادا ان خسته چاغیندا،
دییه، دشمن گتیریب دیر اله فرضیه نی اوستاد،
آتمین بومبی ائدیر عالم انسانلیغی برباد،
اوز نبوغونله اورک لر ائوینی ائتمه سین آباد،
جنگین عفریتی چکر کامینه انسانلاری بیر گون،
بویایار آل قانا دونیانی آخان قانلاری بیر گون.

او همان باغبان ایدی، گول لری ایستردی تیکان سیز،
دده قورقود کیمی داغلار باشین ایستردی دومان سیز،
او همان گوهر ایدی عالم امکان دا مکان سیز،
جانلی ایستردی اووی، اووچونو جان سیز،
یوردون ایستردی خزان سیز.

او همان قارتال ایدی کهلیگی سالمازدی نفسدن،
اوخیان بولبول ایدی باد خزان سالمادی سسدن،
باغیران اصلان ایدی، واهمه ائتمزدی قفسدن،
قوجامان شاعریدی، شعرین آییرمیشدی هوس دن.

سوزونه عشقی واریدی،
اؤزو آلاهه ساریدی،
شانلی حیدربابانین تورک ائلینه یاز نوباری ایدی،
دادلی – دوزلو غزلی، کوتله‌لرین شام ناهاری ایدی،
سوزو دوزگون عیار ایدی،
گئجه‌لر صوبحه کیمین همدمی توزلو سه تاری ایدی،
تاری عمری ایله یاری ایدی،
عاصمین ده باشی نین کؤلگه سالان شهریاری ایدی،
آمما افسوس بویاز شهریارین سون باهاری ایدی،
اللر اوستونده گئدن قبره، ائلین نازلی یاری ایدی .