غریبه دۆنیادیر، بعضاً باش یاریر
آیاغین دستهیی تاختا چلیکلر.
بعضاً قول صاحیبی قولا یالواریر
دۆنیانی فؽرلادیر غریبهلیکلر.
دۆنیا چالخالانیر یئنه دنیز تک.
بو بؤیوک دۆنیانین دردینی چکمک
بیزهمی قالیبدیر؟
واللاه، نه دئییم؟
سنه یوخ، منهسه قالیب، نئیلهییم؟
غریبه دئییلمی؟
سن سیرّ، من ده سیرّ.
بو سیرّی بیلمیریک نئجه چؤزمهلی؟
کیمی اؤولادینین دردینی چکمیر،
کیمی ده خالقینین دردیندن دلی!
تورپاق الدن گئتدی، اؤلکه تالاندی،
سنین نه وئجینه، گۆنون آغ اولسون.
سنینچون دۆنیادا هر شئی یالاندی
تکی داماغین چاغ، جانین ساغ اولسون.
بو بویدا میلّتین آغیر گۆنونده
قاشینی چاتماق دا سنه عذابدیر.
قارداشین دؤیولسه گؤزون اؤنونده
دئیرسن، نه های-کۆی، نه شاپهاشاپدیر؟
آییرا بیلیرسن خئییردن شرّی،
منفعت مئیدانی سنینچین گئندیر.
نه وطن، نه میلّت؟
سندن اؤتری
هاردا خئیرین وارسا، اورا وطندیر.
خالقین نالهسینه قولاقلارین کار،
میلّتین ایچینده میلّته یادسان.
درددن باشیمیزا یاغدی یاغیشلار،
سنی ایسلاتمادی، درددن آزادسان.
بیر قؽریق دیمهدی خئیرین اؤزگهیه
قورو آغاجدان دا مئیوه درمیسن.
خئیرینین گؤزویله باخدین هر شئیه
دۆنیانی جیبینه یئرلشدیرمیسن.
قؽشین چووغونو دا سنه یاز گلیر
اگر منفعتین وار ایسه بوندان.
خئیریندن اؤزگه شئی سنه وؽز گلیر
آراز آچیغیندان، کۆر توپوغوندان.
هئچ دئمه، دۆنیادا دۆنیادا کنار
زامانین چؤلونده یاشایان دا وار...