بیز یاخین اولموشوق قدیمدن، یاخین.
او قدر یاخین کی، بیزیم داغلارین
کؤلگهسی دۆشوبدور سیزین داغلارا.
من افسوس دئمیرم اؤتن چاغلارا.
باخشینین کامانی بیزی آغلادیب،
جبّارین جه-جهی سیزی آغلادیب.
بابام بابان ایله دوست اولوب، آنجاق
دوستلوقدان بیر کلمه دانیشمازدیلار.
بیری-بیریمیزه دیش قؽجارداراق
دوستقلودان دئییریک او کی وار.
ندیر بو ایهاملار، بو آتماجالار،
یئنه شئیطان گیریب آرایا بلکه؟
دئییرم، کناردان بارماق باسان وار
کؤز توتان او کؤهنه یارایا بلکه؟
تورپاق ایستهییرسن سن ایندی مندن،
بو نئجه قارداشلیق، یولداشلیق اولدو؟
اؤزگه تورپاغینا گؤز دیکدیگیندن
سنین نئچه دفعه گؤزون اویولدو؟
سنه درس اولمادی یئنه ده بونلار،
یوخسا تؤکولمهلی آرتیق قانین وار؟
منه اۆزواری قارداش دئییرسن،
آنجاق آلتدان-آلتدان اینهلنیرسن.
ایّام-قدیمدن سادهدیلم من،
باش آچا بیلمهدیم حیلهلریندن.
اگر دۆشمنسنسه، حیلهدن ال چک،
آچیقجا داعوالیق مرامین اولسون.
منیمله مین ایلدیر کسدیگین چؤرک،
آلدیغین کیروهلیک حارامین اولسون!
هاردان سنین اولدو بیزیم قاراباغ؟
آدی صاحیبینی دئمیرمی آشکار؟
خوشلوقلا وئرمزلر تورپاغی. آنجاق
قانلا مؤهورلهییب، زورلا آلارلار.
هله گؤز دیکمیسن ناخچیوانا دا.
تبریز ده. سراب دا بلکه سنینمیش؟
وارتازار یاشایان بۆتون اؤلکهلر -
یعنی بۆتون دۆنیا اؤز وطنینمیش؟..
گۆناهیم ندیر کی، قانقال کیمی سن
بۆتون یئر اۆزونه سپهلنمیسن؟..
آرخینی گل سئلیمه بند ائلهمه،
بو، قان داعواسیدیر، بو، قان داعواسی.
خبریمیز یوخدور... یاماقمیش دئمه
سرچه یوواسینا قارتال یوواسی؟!
یاتیر بو تورپاقدا اجدادیم منیم.
شرفیم،
شؤهرتیم،
اؤز آدیم منیم...
جدّیمین یاتدیغی اولو تورپاغی،
سینهسی ثروتله دولو تورپاغی،
من سنه پای وئریم؟
من قول، سن ارسن؟
سن منی بو قدر آخماق بیلیرسن؟
عیسی بولاغینین زۆمزومهسینی،
جبّارین، سئیّدین، خانین سسینی،
دالغالی قاراباغ شیکستهسینی،
بابک تۆربهسینی نئجه پای وئریم؟
اوغوز نسلیندنم، ار اوغلو ارم،
اؤزگه باغچاسیندان بیر گۆل درمرم،
دوغما تورپاغیمدان چرک وئرمرم،
اگر دارداسانسا، سنه "های" وئریم!
"دؽغالار" یئنه ده یولونو آزمیش،
مندن یوخارییا شیکایت یازمیش،
نئچه یول وئرمیشم، گؤرونور آزمیش،
ایستهییر من اونا یئنه پای وئریم!
22 اوکتیابر، ۱۹۶۶