شاعیره قلم وئر، کاغیذ گتیرین،
شئعریم جرگهلنسین بیر لشگر کیمی
یئنه میصراعلاریم دورسون سؽرایا،
دؤیوش مئیدانیندا سفربر کیمی.
گۆنش، آی قؽزینیر اوجاغیمیزدان،
شرقه ایشیق دۆشور یاراغیمیزدان
دۆنن تۆلکو کیمی قاباغیمیزدان
قاچانلار قاییدیر یئنه شر کیمی.
خیالی باشقادیر ناشی یاغینین،
گؤرونسه سرحددن باشی یاغینین،
قالماز داش اۆستونده داشی یاغینین،
ائلیم سیلاحلانیب بیر نفر کیمی.
اییلمک یاراشماز بیزیم میلّته،
اۆرک ده اویماییر هر «محبّته»
بو تئز – دئدییی «حۆسنو نیته»
هامی نیفرت ائدیر پیس خبر کیمی.
گؤزونو دیکدییین اودلار یوردودور،
گؤردویون بو داغلار، دۆزلر اوردودور.
گئجهلی، گۆندوزلو کئشیکده دورور
هر ائل قهرمانی بیر عسگر کیمی.
آسلان یالوارارمی قورخاق تۆلکویه؟
گۆنش سؽغینارمی قارا کؤلگهیه؟
سعادت مسکنی بیزیم اؤلکهیه
گلسز اؤلهجکسیز اؤلنلر کیمی.
تبریز، ۱۹۴۶