منو
ساوالان
یئنه شاعیر کیمی گئدیب خیالا
نه‌لر دۆشونورسن، ساوالان، نه‌لر؟
سنه یاراشمایان بو غریب حالا
سؤیله، هئچ دؤزرمی بو بیزیم ائللر؟
سنین تۆکنمه‌ین بیر ثروتین وار؛
ندیر بو غملره غرق ائدن سنی،
سؤیله، نه دردین وار، نه حسرتین وار؟
قالدیر باشینداکی اؤرتوگو بیر آن،
یئنه قوینونداکی جلال گؤرونسون.
قوی ائل قهرمانی چؽخسین دوماندان،
نه بئله کدرلی، نه لال گؤرونسون.
دؤیوش گۆنلریمیز یادیندا وارمی؟
اؽندی یاد اؤنونده سوسماق اولارمی؟
ساوالان، من سنه تاپشیردیم آخی
بیز آیریلان زامان اؤز دیلداریمی.
دئدیم: - قورو اونو، قورو وطنی.
بیلیرسن پیس گۆنون عؤمرو آزدیر، آز.
ائللر آرخا بیلیر اوّلدن سنی،
اؽندی ساکیت دورماق سنه یاراشماز.
یئنه امر ائدرسه بیر گۆن فیرقه‌میز،
دۆشمنین اۆستونه یۆری‌ینده بیز،
سنین اتگیندن باشلایاجاقدیر
اؤز ایلک یۆروشونو عسگرلریمیز.
سن آذر یوردونون ایفتیخاریسان،
شاهلار، آتابَیلر باش اگمیش سنه.
بیر گۆن بایراغینی قالدیرسان، اینان
دۆشمن تۆلکو کیمی قاچاجاق یئنه،
نئجه کی، بیز زامان قاچدی عربلر.
خالقیم دؤیوشلردن چؽخدی مۆظفّر.
خلیفه تاختیندا دورا بیلمه‌دی
چاتینجا باغدادا بابکدن خبر.
ایندی ده بو یانغین، بو زیندان، بو دار
آذر اؤولادی‌نی آیاقدان سالماز.
فقط اونوتماسین، دئیین، آغالار،
منیم غضبیمدن قورتارماق اولماز.
او یانان داخمالار، ائولر منیمدیر،
سانیرام آلیشان اؤز بدنیمدیر.
اونون آغری‌سی‌نی من چکیرم، من،
چۆنکی او، یوردومدور، او، وطنیمدیر.
ساوالان، اوجا توت دایم باشینی،
وطن بایراغینی شرفله ساخلا.
دوغما تورپاغینی، دوغما داشینی
یئنه قورویاجاق ائل او بایراقلا.
دئمه اؤز یوردومدا غریب بیر داغام؛
بیل کی، اؤلمه‌میشم، نه قدر ساغام،
نه قدر دۆشمه‌میش الیمدن تۆفنگ
سنینچین، وطنچین ووروشاجاغام.
۱۹۴۸