اصل شاعیر

مدینه گۆلگونه

سنین آرزولارین، حیسّین، ایلهامین
لئیسان یاغیشینا بنزر هر زامان.
تئز یاغیب، تئز کئچر، باغی، چمنی
عطیرلی گۆللری بزر هر زامان.

سئوینجین، کدرین بیر داغ سئلیدیر،
او، ساکیت آخمامیش، آخماز بیر آندا،
قلبینین اودوندان قایناییر، اینان،
شیمال قۆطبونده‌کی بوزلو عومّان دا.

غضبین، نیفرتین شؽمشک کیمیدیر
سال داشی پارچالار، قایادان کئچر.
قلبین دئمه‌ینی دئمز قلبین ده،
سنی بوغازیندان آسسالار اگر.

فیکرینده، سؤزونده خسیس اولانلار
یۆز ایل یاشاسا دا، بیل، گؤزه دگمز.
دویغوسوز یازیلمیش یۆزلرله اثر،
اۆرکدن دئییلمیش بیر سؤزه دگمز.

بو اودلو خیصلتی سؤزونه آخمیش،
دوستو ایسیندیرر، یادی یاندیرار.
آلوو پارچاسیدیر هر میصراعن سنین
اونو اودا آتسان، اودو یاندیرار.

سن بو ایلهامینلا، تخیّولونله
بیر ایل ده یاشاسان، یۆز ایل ده قالسان،
سؤنمز حرارتین، سؤنمز آتشین
سنی شاعیر دوغموش ازلدن آنان.

۱۹۵۸