اوجالان ساوالان

قارقیش زمانه نین قانونلارینا

قارقیش اورکلری آییرانلارا

قارقیش انسانلاری قفسه سالیب

بشر حقوقوندان دم وورانلارا


کیمه دئمه لی ییک دردیمیزی بیز؟

دیل بیلن کیمدی سؤز آنلایان کیمدی؟

اسیر بیر میللته محکوم بیر ائله

قایغی چکن کیمدی آغلایان کیمدی؟


دیلیمی دالیمدان چیخارتسالار دا

قوی قارداش دردیمی دئییم باری

گۆنئیدن قوزئیه، شرقدن غربه

هانسی خلقی گؤردۆن بیزیم تک ذلیل؟


دئمیرم دونیادا اسارت یوخدور

چوخ یئرلرده سونگو تاخمیش استعمار

آنجاق بیزیم کیمی ازیلن آزدیر

هاردا حق وئرمز وار، حق تاپیلماز وار!


میللی آزادلیقلار عصری اولسادا

هر یئرده هر یاندا آدی بو عصرین

نه ائتمک "دونیانی بوغدا توتسادا

کهلیگین روزوسو چینقیلدیر" همین


بو شرف بو شوکت بو قدرت بو شان

هارا دوغورداندا بیزه عار اولسون

حیاتین آمانسېز بیر قانونو وار:

تعصب‌ سوز میللت گرَک خوار اولسون


 میللی تعصب دن دانیشدیم اولسون

اصلینی ایتیره‌ ن حرامزادا دیر

مرد اوغول وطنین، حقین ایتیرمز

وطن انسانلارا ان بؤیۆک آنادېر


قویون محکوم اولدوم میللتچی‌ لیگه

دونیادا میللتین سئومه ‌ین کیمدیر؟

دیلین، ائلین، یوردون تالان ائتسه ‌لر

آجېیېب باشېنا دؤگمه ‌ین کیمدیر؟


گرَ‌ک گؤزلریندن گؤز اؤرته هر کس

قارقا یوواسېنا یاناشسا اگر

نیه وطنیمی سئومه ‌ییم، نیه؟

من بیر قارقادان دا اسکیگم مگر؟


من دئمیرم اۆستون نیژاددانام من

دئمیرم ائللریم ائللردن باشدی

منیم مسلکیمده،‌ منیم یولومدا

ملت‌لر هامیسې دوستدی، قارداشدی


چاپماق ایسته میرم من هئچ میللتین

نه دیلین نه یئرین نه ده اَمَگین

تحقیر ائتمه ییرم هَدََه له میرم

کئچمیشین ایندیسین یا گله جه یین


من آییرماییرام آیری سالمیرام

قارداشی قارداشدان آروادی اردن

آنانی بالادان اتی دیرناقدان

اورَگی اورگدن قانادی پردن


پوزماق ایسته میرم من بیرلیکلری

انسانلېق بیرلیگی ایده‌آلېمدېر

قارداشلېق، یولداشلېق، ابدی بارېش

دونیادا ان بؤیۆک آرزېلارېمدېر


آنجاق بیر سؤزۆم وار: من ده انسانام

دیلیم وار، خلقیم وار، یوردوم- یووام وار.

یئردن چېخمامېشام گؤبَلک کیمی

آدامام، حاقیم وار، ائلیم – اوبام وار


قول یارانمامېشام یاراناندا من

هئچ کسه اولمارام نه قول، نه اسیر

قورتولوش عصریدیر، انسانا بو عصر

اسیر اولانلار دا بوخووون کسیر


قورتولوش ایسته رَم محکوم ائلیمه

بو نه شیلتاقدیر، نه طاماهکارلیق

دیلیزه دَیمیرَم ، دیلیمه دَیمه

بو سؤزون هاراسی سوچدور، گوناهدیر؟