قام غان اوغلو باییندیر خان یئریندن دورموشدو. یۆکسک ائوینی قارا
یئر اۆزرینده اوجالتمیشدی. هۆندور آلاچیغی گؤی اۆزونه دیرنمیشدی. مین یئرده
ایپک خالچالار دؤشتدیرمیشدی. ایچ اوغوز و داش اوغوز بیلری توپلاشمیشدیلار.
دوققوز تۆمنلیک گۆرجوستانین خراجی گلدی: بیر آت، بیر قؽلینج و بیر چوماق گتیردیلر.
باییندیر خان برک دیلخور اولدو. ددهم قورقود گلدی، شادلیق هاواسی
چالدی. «خانیم، نیه قانین قارالیب؟» – دئدی. دئییر: «نئجه قارالماسین،
هر ایل قؽزیل-گۆموش گلیردی، جاوانلارا-بیلره وئریردیک، خاطرلری شاد
اولوردو. ایندی بونلاری کیمه وئرک کی، اونونچون خوش اولسون؟».
دده قورقود دئییر: «خانیم، بونون اۆچونو ده بیر ایگیده وئرک، اوغوز
ائلینه قاراوول چکسین!». باییندیر خان «کیمه وئرک؟» – دئدی، ساغیناسولونا
باخدی. هئچ کیم راضی اولمادی. بکیل دئییلن بیر ایگید واردی. اونا
باخدی، دئدی: «سن نه دئییرسن؟» بکیل راضی اولدو. قالخدی، یئری اؤپدو.
ددهم قورقود گتیریلن قؽلینجی اونون بئلینه باغلادی. چوماغی چینینه
سالدی، یایی قولونا کئچیردی.
بکیل شاهانه آیغیری چکدیریب میندی. قوهوم-اقرباسینی آییردی، ائوئشیینی
یؽغیشدیردی، اوغوز ائلیندن کؤچدو. بردهیه، گنجهیه گئدیب
مسکن سالدی. گئدیب دوققوز تۆمنلیک گۆرجوستان سرحدینده چادیر
قوردو. قاراوولچولوق ائلدی. بورالارا یاد کافیر گلسه ایدی، باشینی اوغوز
ائلینه هدییه گؤندرردی. ایلده بیر دفعه باییندیر خانین دیوانینا گئدیردی.
بیر دفعه یئنه باییندیر خاندان آدام گلدی کی، تئز گل. بکیل ده گلدی.
هدییهلرینی یئره قویدو، باییندیر خانین الینی اؤپدو. خان دا بکیلی قوناق
ائتدی. یاخشی آت، یاخشی قافتان، بوللوجا خرجلیک وئردی. اۆچ گۆن تام عزیزلهدی،
حؤرمت ائتدی. «بکیلی اۆچ گۆن ده اوو اتی ایله قوناق ائلیک، بیلر!» – دئدی.
اووا حاضرلیق اۆچون جار چکیلدی. ائله کی، اوو حاضرلیغی تامام اولدو، کیمی
آتینی، کیمی قؽلینجینی، کیمیسی ده یای چکیب اوخ آتماغینی تعریفلهدی. سالور
قازان نه اؤزونو، نه آتینی تعریفلهدی. اما بیلرین هۆنریندن دانیشدی.
اۆچ یۆز آلتمیش آلتی ایگید اووا آتلانسا، کئییک اۆزرینه یۆروش اولسا، بکیل
یای قورماز، اوخ آتمازدی. ائله یایی بیلییندن چؽخاریب، بوغانین-سؽغینین
بوینونا آتاردی، چکیب دورغوزاردی. آریق اولسا، قولاغینی دلردی کی، اوودا
بللی اولسون. اما کؤک اولسا، بوغازلاییب کسردی.
بیلر، قولاغی دئشیک کئییک اوولایاندا «بو، بکیلین نیشان ائتدییدیر»،
– دئیه اونا گؤندریردیلر.
قازان بی دئدی: «بو هۆنر آتیندیر، یا ایگیدیندیر؟». دئدیلر: «خانیم،
ایگیدیندیر!». خان دئدی: «یوخ، آت ایشلمهسه، ار اؤیونمز. هۆنر
آتیندیر». بو سؤز بکیله خوش گلمهدی. دئدی: «ایگیدلر ایچینده بیزی بدنام
ائدیب، قوشقونوموزادک پالچیغا باتیردین». باییندیر خانین هدییهسینی
اؤنونه قویدو؛ خاندان کۆسدو، دیواندان چؽخدی. آتینی گتیردیلر. آلا گؤزلو
ایگیدلرینی ده گؤتوروب ائوینه گلدی. اوغلانلاری قارشیسینا گلدی، اونلاری
اوخشامادی. آغ اۆزلو خانیمی ایله دانیشمادی. قادین بورادا سویلامیش، گؤرک،
خانیم، نه سویلامیشدیر:
قؽزیل تاختیمین ییهسی، ایگید بییم!
گؤز آچاراق گؤردویوم،
کؤنول وئریب سئودییم،
قالخاراق یئریندن دوروب گلدین.
آلا گؤزلو ایگیدلرینی یانینا سالدین.
آرقوبئلدن، آلا داغدان گئجه آشدین.
جوشغون آخان گؤزل سودان گئجه کئچدین.
آغ آلینلی باییندیر خانین دیوانینا
گئجه گئتدین، بیلر ایله یئدین-ایچدین.
هره اؤز قوهوم-قارداشی ایله دئییب-گۆلدومو؟
قریبلیکده تکلنمک خترینه دیدیمی؟
هانی، خانیم، آلتیندا یاخشی آتین یوخدور!
آلنینی اؤرتن قؽزیل ایشیقلی زیرئهین یوخدور!
آلا گؤزلو بیلرینی اوخشامیرسان،
آغجا اۆزلو سئوگیلینله دانیشمیرسان،
حالین نیه بئلهدیر؟
بکیل سویلامیش، گؤرک، خانیم، نه سویلامیشدیر:
قالخاراق یئریمدن دوروب گئتدیم،
قارایاللی گؤزل قازلیق آتی میندیم.
آرقوبئلدن، آلا داغدان گئجه کئچدیم.
جوشغون آخان گؤزل سودان اؤتوب-کئچدیم.
آغ آلینلی باییندیرین دیوانینا چاپار یئتدیم.
آلا گؤزلو بیلرله یئدیم-ایچدیم.
هر کسی اؤز قوهوم-قارداشییلا مئهریبان گؤردوم.
بیزدن تامام اۆز دؤندریبدیر خان، گؤردوم.
ائلیمی-گۆنومو کؤچوروب گلین،
دوققوز تۆمنلیک گۆرجوستانا گئدک،
اوغوز ائلیندن اۆز دؤندردیم، قطعی بیلین!
آروادی دئییر: «ایگیدیم، بی ایگیدیم! پادشاهلار اللهین کؤلگهسیدیر.
پادشاهینا آغ اولانین ایشی دۆز گتیرمز. تمیز اۆرکده پاس اولسا، شراب
آچار. سن گئدهلی، خانیم، چؽلپاق قالان اوجا داغلارین اوولانماییبدیر. اووا
آتلان چؽخ، کؤنلون آچیلسین!»
بکیل گؤردو کی، آروادین عقلی-باشی یاخشیدیر. قازلیق آتینی چکدیریب
میندی. اووا گئتدی.
اوو اوولاییب گزرکن قاباغینا بیر یارالی کئییک چؽخدی. بکیل اونون
اۆستونه آت سالدی. بوغانین آرخاسیندان یئتیشدی. یای کیریشینی بوینونا آتدی.
بوغا آجیقلانمیشدی. اؤزونو اوجا بیر یئردن آتدی. بکیل آتین جیلووونو
ساخلایا بیلمهییب، کئییکله برابر اوچوندو. ساغ اویلوغو قایایا توخونوب
سؽندی. بکیل آیاغا دوروب آغلادی. دئدی: «بؤیوک اوغلوم، بؤیوک قارداشیم
دا یوخدور!..» سونرا پالتارینین قولوندان بئز چؽخاریب، آتینین ترکیندهکی
قاییشلاری دارتیب قؽردی. قافتانینین آلتیندان آیاغینی آتا برک ساریدی. وار
قوهسی ایله آتینین یالینا سریلدی. اووچولاردان آیری دۆشموش بکیلین سینباغیسی
سۆروشوب بوغازینا کئچدی. یاشادیغی ساحهیه یاخینلاشدی. اوغلو ایمران
پهلوان آتاسینین قارشیسینا گلدی. گؤردو بنیزی سارالمیشدیر، سینباغی
بوغازینا کئچمیشدیر. اوغلان بورادا بکیلین یولداشلارینی سوروشوب
سویلامیش، گؤرک، خانیم، نه سویلامیشدیر:
قالخاراق یئریندن دوروب گلدین،
قارا یاللی گؤزل قازلیق آتینی میندین.
یالچین اوجا داغلار اتیینه اووا گئتدین.
قارا دونلو کافیرلرله راستلاشدینمی؟
آلا گؤزلو ایگیدلرینی قؽردیردینمی؟
اؤز دیلینله بیر نئچه سؤز سؤیله منه!
قارا باشیم قوربان اولسون، آغام، سنه!
بکیل اوغلونا سویلامیش، گؤرک، خانیم، نه سویلامیش، دئمیشدیر:
اوغول، آی اوغول!
قالخیب یئریمدن دوردوم، گلدیم.
اوجا داغلارین دؤشونه اووا چؽخدیم.
قارا دونلو کافیرلره اوغرامادیم.
آلا گؤزلو ایگیدلریمی قؽردیرمادیم.
ساغ-سالاماتدیر، ایگیدلریم، قملنمه!
اۆچ گۆندور کی، اهوالیم یوخ، خستیم!
اوغول، آت اۆزریندن گؤتور منی، یاتاغا سال! دئدی.
آسلان بالاسی یئنه آسلاندیر. آتاسینی آتین اۆستوندن قامارلاییب توتدو،
یاتاغینا گتیردی؛ جۆببهسینی اۆزرینه آتدی. قاپینی اؤرتدو.
بو یاندان ایگید بیلر گؤردولر کی، اوو پوزولموشدور؛ هر بیری اؤز
ائوینه گلدی.
بکیل بئش گۆن اؤز دیوانینا چؽخمادی. آیاغینین سؽندیغینی کیمسهیه
دئمهدی. بیر گئجه دؤشک اۆستونده برک-برک اینلهدی، آه-وای ائتدی. آروادی
دئدی: «ایگید بییم، سۆرو ایله دۆشمن گلسیدی قورخمازدین. آتینا ایتی اوخ
دیسیدی، اییلمزدین. آدام اؤز قوجاغیندا یاتان آروادینا دا سیررینی
دئمزمی؟ سنه نه اولوب؟ بکیل دئدی: «گؤزلیم، آتدان دۆشدوم، آیاغیم
سؽندی».
آرواد الینی الینه ووروب قاراواشا خبر وئردی. قاراواش دا چؽخیب
قاپیچییا سؤیلهدی. اوتوز ایکی دیشدن چؽخان سؤز بۆتون جاماعات آراسیندا
یاییلدی: «بکیل آتدان یؽخیلیب، آیاغی سؽنیبدیر...»
دئییلنه گؤره، کافیرین جاسوسو واردی. بو خبری ائشیدیب گئتدی، تکوره
خبر وئردی. تکور دئییر: «قالخیب یئرینیزدن دورون، یاتان یئرده بکیل
بیی توتون! آغ اللرینی قوللاریندان باغلایین. گئجیکمهدن گؤزل باشینی
کسین. آل قانینی یئر اۆزونه تؤکون. ائلینی-یوردونو چاپیب تالایین. قؽزگلینینی
اسیر ائدین!».
بکیلین ده اورادا جاسوسو واردی. بکیله خبر گؤندردی. دئدی: «باشینیزا
چاره ائیلیین، اۆستونوزه دۆشمن گلیر». بکیل یوخاری باخدی؛ «گؤی
اوزاق، یئر ده برک!» دئیه دۆشوندو. اوغلونو یانینا چاغیریب سویلامیش،
گؤرک، خانیم، نه سویلاییب، دئمیشدیر:
اوغول، اوغول، آی اوغول!
قارانلیق چؤکموش گؤزومون ایشیغی اوغول!
گۆجلو بئلیمین قوهسی اوغول!
گؤر آخیردا نلر اولدو،
منیم باشیما نلر گلدی.
اوغول، قالخاراق یئریمدن دوروب گئتدیم،
بوینو سؽنسین، او گؤزل آل آیغیری میندیم،
اوو اوولاییب قوش وورارکن یورولدو،
سۆروشهرک منی یئره ووردو.
ساغ اویلوغوم سؽندی.
گؤر، بلالی باشیما نلر گلدی.
اوجا داغلاردان خبر آشمیشدیر،
آشقین-داشقین سولاردان خبر کئچمیشدیر.
دمیر قاپی دربنددن خبر گئتمیشدیر.
آلجا آتلی شؤکلو ملیک برک پوسقو قورموشدور.
پوسدوغو واختدان اوجا داغلارا دومان دۆشموشدور.
«یاتدیغی یئرده بکیل بیی توتون!» – دئمیشدیر،
«آغ اللرینی قوللاریندان باغلایین!» – دئمیشدیر.
«قان تؤکوب یئرینی-یوردونو چاپین!» – دئمیشدیر.
«آغ اۆزلو قؽز-گلینین اسیر توتون!» – دئمیشدیر.
اوغول، قالخاراق یئریندن دور گل!
قارایاللی گؤزل قازلیق آتینی مین!
یالچین قایالی آلا داغی گئجیله آشیب،
آغ آلینلی باییندیر خانین دیوانینا گئت!
ادب-ارکانلا باییندیر خانا سلام وئر!
بیلر بیی اولان قازانین الین اؤپ!
«آغ ساققاللی آتام خستهدیر»، سؤیله،
قازان بی موطلق منه یئتیشسین، سؤیله!
گلمسن، یوردوموز تالاندی، سؤیله!
قؽز-گلینیم اسیر گئتدی اؤزگه ائله!
بو یئرده اوغلان آتاسینا سویلامیش، گؤرک، خانیم، نه سویلامیش-دئمیشدیر:
آتا، نه سؤیلییر، نه دانیشیرسان؟
اۆرییمی، باغریمی نه داغلاییرسان؟
قالخاراق اؤز یئریمدن چوخ دورموشام،
قارایاللی قازلیق آتیما چوخ مینمیشم.
آرقوبئلی، آلا داغی اوو خترینه آشمامیشام.
آغ آلینلی باییندیرین دیوانینا گئتممیشم.
قازان کیمدیر؟ من اونون الینی اؤپممیشم.
آلتینداکی آل آیغیرینی منه وئر،
ائله چاپیم، باسسین اونو قوی قان-تر!
اینیندهکی دمیر دونونو منه وئر،
قولچاق، یاخا تیکدیریم من سنینچین!
بؤیوک، ایتی پولاد قؽلینجی منه وئر،
بیرجه آندا باشلار کسیم سنینچین!
قارغی بوداغیندان اولان سۆنگونو وئر منه،
سانجیم اونو من سنینچین دۆشمن کؤکسونه!
آغ للکلی ایتی اوخونو وئر منه،
آتیب سانجیم ایستدیین دۆشمنه!
آلا گؤزلو اۆچ یۆز ایگید قوش منه،
بو دؤیوشو حصر ائلییم محمدین دینینه!
بکیل دئییر: «اؤلوم آغزین اۆچون، اوغول! بلکه ده منیم کئچمیش
گۆنلریمی خاتیرلاتمایاجاقسان...آیا، گئییمیمی گتیرین، اوغلوم گئیسین!
آل آیغیریمی گتیرین، اوغلوم مینسین! ائل واهیمهیه دۆشممیش اوغلوم گئدیب
دؤیوش میدانینا گیرسین!».
اوغلانی گئییندیریب-کئجیندیردیلر. گلیب آتا-آناسی ایله گؤروشدو. اللرینی
اؤپدو. اۆچ یۆز ایگیدی یانینا سالیب، دؤیوش میدانینا گئتدی.
آل آیغیر دۆشمن قوخوسو حسّ ائدنده آیاغینی یئره دؤیردی، توزو
گؤیه چؽخاردی.
کافیرلر دئدی: «بو آت بکیلیندیر، بیز قاچیریق». تکور دئدی: «اده،
یاخشی باخین. بو گلن بکیلسه، سیزدن اول من قاچیرام».
گؤزتچی گؤزلهدی. گؤردو کی، آت بکیلیندیر، آنجاق بکیل اۆزرینده دئییل.
آتین بئلیندهکی قوش کیمی بیر اوغلاندیر. گلیب تکورا خبر وئردی. دئییر:
«آت، یاراق و ایشیقلی زیرئه بکیلیندیر، بکیل ایچینده دئییل!». تکور
دئییر: «یۆز آدام سئچین، گورولتو قوپاریب های-کۆی سالین، اوغلانی قورخودون.
اوغلان قوش اۆرکلی اولار، میدانی قویوب قاچاجاق».
یۆز کافیر سئچیلیب اوغلانین اۆزرینه گلدی. کافیر اوغلانا سویلامیش، گؤرک،
خانیم، نه سویلامیشدیر:
اوغلان، اوغلان، آی اوغلان،
هارامزادا اوغلان!
آلتیندا آل آیغیری آریق اوغلان.
بؤیوک، ایتی پولاد قؽلینجی گؤدک اوغلان!
الیندهکی سۆنگوسو سؽنیق اوغلان!
دستیی آغ توزلو یایی نازیک اوغلان!
بیلیینده دوخسان اوخو سئیرک اوغلان!
یانینداکی یولداشلاری چؽلپاق اوغلان!
قارانلیق چؤکموش گؤزلری چؤکوک اوغلان!
شؤکلو ملیک سنی مؤحکم پوسموش،
میدانداکی او اوغلانی توتون، دئمیش،
اللرینی-قوللارینی باغلایین، دئمیش،
بیرجه آندا گؤزل باشین کسین، دئمیش.
آل قانینی اۆزونه آخیدین، دئمیش...
آغ ساققاللی آتان وارسا، آغلاتما!
آغ بیرچکلی آنان وارسا، اینلتمه!
یالقیز ایگید آلپ اولماز،
یووشان دیبی برک اولماز.
اجلی چاتمیش ابله اوغلو ابله،
قاییدیب، دؤن بوردان گئری!
اوغلان دا بورادا سویلامیش، گؤرک، نه سویلاییب، دئمیشدیر:
ائی ایتیم کافیر، هرزه-هرزه دانیشما!
آلتیمدا آل آیغیریمی نه بینمیرسن؟
سنی گؤروب اویناییر.
اینیمدهکی دمیر دونوم چینیمی قؽسیر.
بؤیوک ایتی پولاد قؽلینجیم قؽنینی دوغراییر.
قارغی بوداغیندان سۆنگومو نه بینمیرسن؟
کؤکسونو دلهرک گؤیه فؽرلادار.
دستیی آغ توزلو برک یاییم زار-زار اینلییر،
اوخلاریم اؤز قابینین کیشینی دلیر.
یانیمدا ایگیدلریم دؤیوش ایستییر.
ایگید آداما هده-قورخو گلمک عیبدیر.
آی کافیر، بری گل، دؤیوشک!
کافیر دئییر: «اوغوزون آرسیزی تۆرکمانین دلیسینه بنزییر، بونا باخ
آ!...» تکور دئییر: «گئدین سوروشون، اوغلان بکیلین نییدیر؟». کافیر گلیب
اوغلانا سویلامیش، گؤرک، نئجه سویلامیشدیر:
بیلیریک کی، آلتینداکی آل آیغیر بکیلیندیر،
بکیل هانی؟
بؤیوک، ایتی پولاد قؽلینجین بکیلیندیر،
بکیل هانی؟
اینیندهکی دمیر دونون بکیلیندیر،
بکیل هانی؟
یانینداکی ایگیدلرین بکیلیندیر،
بکیل هانی؟
اگر بکیل بوردادیرسا،
گئجیدک بیز ووروشاق،
دستیی آغ توزلو اولان
برک یایلار دارتیشدیراق.
آغ للکلی کسکین، ایتی
اوخلارلا بیز آتیشاق.
سن بکیلین، دئ، نییسن،
تئز اول، سؤیله بیزه، اوغلان!
بکیلین اوغلو بورادا سویلامیش، گؤرک، خانیم، نه سویلامیش، دئمیشدیر:
«آی کافیر، سن منی تانیمیرسانمی؟ آغ آلینلی باییندیر خانین بیلربییسی
سالور قازان، اونون قارداشی قاراگونه چاپاراق یئتیشدی. دؤنبیلمز
تۆلک ووران، دؤزن اوغلو آلپ رۆستم، بوز آتلی بئیرک بی
بکیلین ائوینده یئییب-ایچیردیلر؛ جاسوس سندن خبر گتیردی. آلتینداکی
آل آیغیرا بکیل منی میندیردی. بؤیوک ایتی پولاد قؽلینجینی قوت اۆچون
وئردی: قارغی بوداغیندان اولان سۆنگوسونو غیرت اۆچون وئردی؛ اۆچ یۆز
ایگیدینی منه یولداش کیمی قوشدو. من بکیلین اوغلویام، آی کافیر! بری
گل، دؤیوشک!».
کافیر تکور دئییر: «هله بیر دؤز، ابله اوغلو، من سنه گلیم
چاتیم!» آلتی پرلی گۆرزونو اله آلیب، آتینی اوغلانین اۆزرینه سۆردو. اوغلان
قالخانینی گۆرزون قاباغینا توتدو. کافیر یوخاریدان آشاغییا دوغرو اوغلانی
برک ووردو: قالخانینی اوودو، دبیلقهسینی ازدی، اۆز-گؤزونو سؽییردی، آنجاق
اوغلانی مغلوب ائده بیلمهدی. گۆرزله دؤیوشدولر، ایتی پولاد قؽلینجلا ووروشدولار،
آتیلا-آتیلا میداندا قؽلینجلاشدیلار؛ چیینلری دوغراندی، قؽلینجلاری
اووولوب تؤکولدو، بیر-بیرینه اۆستون گله بیلمهدیلر. قارغی بوداغیندان
اولان سۆنگولرله چارپیشدیلار، میداندا بوینوزلارینی بیر-بیرینه
سانجماق ایستین بوغالار کیمی دؤش-دؤشه گلدیلر؛ سۆنگولری سؽندی، بیربیرینی
تسلیم ائده بیلمهدیلر. آت اۆزریندن بیر-بیریله قاپیشیب-دارتیشدیلار.
کافیرین گۆجو چوخ ایدی، اوغلان الدن دۆشدو. الله تعالییا یالواریب
سویلامیش، گؤرک، نئجه سویلامیشدیر:
اوجالاردان اوجاسان، اوجا تانری!
کیمسه بیلمز نئجسن، گؤزل تانری!
سن آدمه تاج وئردین،
شیطانا لعنت ائتدین.
بیر گۆناهدان اؤترو قاپیندان قوودون.
ایبراهیمی توتدوردون.
خام گئنه بۆرودون.
گؤتوروب اودا آتدیردین.
اودو گۆلشنه دؤندردین
بیرلیینه سؽغیندیم، عزیز الله،
منه کؤمک ائت!
کافیر دئدی: «اوغلان، مغلوب اولاندا اللهینامی یالواریرسان؟ سنین
بیر اللهین وارسا، منیم یئتمیش ایکی بۆتخانم وار!» اوغلان دئییر: «ائی
لعنته گلمیش آزغین، سن بۆتلرینه یالواریرسان، من وارلیقلاری یوخدان
وار ائدن اللهیما سؽغینیرام».
الله تعالی جبراییلا امر ائتدی کی:»ائی جبراییل، گئت، او قولوما قؽرخ
کیشی قوهسی وئردیم».
اوغلان کافیری گؤتوروب یئره ووردو. بورنوندان قانی دۆدوک کیمی شورولدادی.
ایمران سؽچراییب کافیرین بوغازینی شاهین کیمی اله کئچیردی.
کافیر دئییر: «ایگید، آمان وئر، سیزین دینینیز هانسیدیر؟ قبول ائدیرم».
بارماق قالدیریب شهادتینی سؤیلهدی، مۆسلمان اولدو. قالان کافیرلر
بونو بیلدیلر، میدانی قویوب قاچدیلار.
ایمرانین یولداشلاری کافیرین یورد-یوواسینی داغیتدیلار، قؽزینی-گلینینی
اسیر ائتدیلر.
اوغلان اؤز آتاسینا موشتولوقچو گؤندردی کی، دؤیوشده قالیب چؽخدیم.
آغ ساققاللی آتاسی اونو قارشیلاییب، بوینونو قوجاقلادی.دؤنوب ائولرینه
گلدیلر. آتاسی اوجا داغدا اوغلان اۆچون یایلاق آییردی. ایتی گئدن قاراجیق
آتلار اۆچون تؤوله آییردی. آغ اۆزلو اوغلونا شۆلنلیک اۆچون آغجا قویونلار
آییردی. آلا گؤزلو اوغلونا آل اؤرتوکلو گلین آلدی.آغ آلینلی باییندیر خان
اۆچون پای آییردی؛ اوغلونو گؤتوروب، اونون دیوانینا گئتدی. الینی اؤپدو.
پادشاه قازان اوغلو اوروزون ساغ یانیندا اونا یئر گؤستردی. گؤزل
ناخیشلی جۆببه-چوخا گئییندیردی.
ددهم قورقود گلیب شادلیق هاواسی چالدی. بو اوغوزنامنی دۆزدوقوشدو.
«بکیل اوغلو ایمرانین اولسون!» – دئدی. ایگیدلرین باشینا نه گلدیینی
سؤیلهدی. خئییر-دعا وئرک، خانیم!
یئرلی اوجا داغلارین یؽخیلماسین!
کؤلگهلیک ایری آغاجین کسیلمهسین!
الله وئرن اۆمیدین اۆزولمهسین!
گۆناهینیزی آدی گؤزل محمده
باغیشلاسین الله، خانیم، هئی!