نقطۀ خال و گؤزو قاشی ییغیلمیش نییه

خال میشکینه باخین، عارض جانانه دوشوب،
دئیه سن بیر حبشی صفحۀ ایرانه دوشوب.

مرغ دیل دانۀ خالین گؤره لی ناله چکر،
قسمت روز ازل آه ایله افغانه دوشوب.

عارض آلده دیر خال سیاهی، الحق،
خط میشکین نئجه کیم لالۀ نعمانه دوشوب.

ای گؤزوم نوری، یوزونده باخ او خال سیاهه،
خبر ائت مرغ دیله کیم، اودو بیر دانه دوشوب.

مرغ دیل دانۀ خالین هوسیله دوشموش،
حلقۀ زلفه کی، زنجیره چو دیوانه دوشوب.

او کامان قاشه قویوب غمزه اوخون، تورک یوزون،
شهره آشوب سالیب، هر بیری بیر یانه دوشوب.

گؤره لی دیل سر زلفینی کؤنول بند اولدو،
میصرده یوسف کنعان نئجه زیندانه دوشوب.

دئریمیش دلبر کیم، کؤنلو دئگیل منده مقیم،
دیل دؤنوب قانه او گوندن کی، بو بهتانه دوشوب.

نقطۀ خال و گؤزو قاشی ییغیلمیش نییه،
دؤورده زلفو کمینه کیمی پیکانه دوشوب.