کمینه شوکر ایله هر لحظه، هر زامان سؤیلر

نه ائتمیشم فلکه، بویله قیلدی زار منی؟
دیار هیجر-آرا زار و دلفکار منی.
هوای سروقدینله کمان اولوب قددیم،
بو چرخ پیر ائله‌ییب ایندی اشکبار منی.
بسان صورت بیجان بو کنج پنهاندا،
سالوبدو حلقۀ زنجیره زلف یار منی.
دوشوبدو کوه و بیابانه قئیس بی پروا،
قویوبدو حسرت نظاره آشکار منی.
بو اشک چشمیله سؤندورم آتش هجری،
سیپندوش ائله‌ییب چونکی بیقرار منی.
تملق اهلی دئییلدیم، نه وار ایدی باکیم،
کمند زلفیله ائتمیش یاریم شکار منی.
کمینه شوکر ایله هر لحظه، هر زامان سؤیلر:
ائدیبدی درد و غمه لاشریک یار منی.