ای فضولی، جان وئرن جانانا نقصان ائتمه دی

آچمادی کؤنلوم فلک، تا باغریمی قان ائتمه دی،
قیلمادی خرم منی، تا زار و گریان ائتمه دی.
شکر کیم، وئردی فلک کامیم، منی نومید ائدیب،
شیوۀ مهر و محبتدن پشیمان ائتمه دی.
صبر یوخدور مردم عالمده، یوخسا روزگار
خانسی مشکل دور کی، تدریج ایله آسان ائتمه دی؟
قیلمادی بیدادیله یوز پاره پرخون کؤنلومی،
بو چمنده گل کیمی بیر لحظه خندان ائتمه دی.
درد یوخدور کیمسه ده، یوخسا طبیب درد عشق
کیمده گؤردی درد کیم، اول درده درمان ائتمه دی؟
توتدی سیلاب دو چشمیم یئر اوزون، اما خوشا
کیم، بنای صبریمی اول سیل ویران ائتمه دی.
عشق سوداسیندا سود ائتدیم متاع وصلدن،
ای فضولی، جان وئرن جانانا نقصان ائتمه دی.