سندن همیشه تیر بلا دیر گلن منه

خوش گلدی دون اول آیه سرشکیم نظاره سی،
بیر ایش دوشر کی، عاشقین ایشلر ستاره سی.
ای هر مرض علاجینه حکم ایله ین طبیب،
بیمار درد عشق اولانین یوخمی چاره سی؟
چیخماق دیلر سفینۀ تن جنبش ایله جان
دریای عشقدن کی، عدم دیر کناره سی.
دئرلر کی، وار وامق و مجنون، عجب دئگیل،
داغیلمیش اولا آتش عشقیم شراره سی.
نولدی گتیرمدین اله صدپاره کؤنلومی،
وهم ائیله دینمی ال کسه بو شیشه پاره سی؟
سندن همیشه تیر بلا دیر گلن منه،
بؤیله اولورمی عاشق و معشوقین آره سی؟
ای سؤیله ین فضولییه عشق ایچره صبر قیل،
سؤیله، بو مرهم ایله کیمین بیتدی یاره سی؟