آدم ایسن باغ سیرین ائیله بو موسمده کیم

چیخدی یاشیل پرده دن، عرض ائیله‌دی رخسار گل،
سالدی مرآت ضمیر پاک دن زنگار گل.
جام دعوت ساقی کی، گلبن لر گل اظهار ائتدی لر،
سن داخی بیر گلبن رعناسن، ائت ازهار گل.
گلدی اول دم کیم، اولا اظهار حکمت قیلماغا،
انشراح صدرایله صدر صف ازهار گل.
یئتدی اول موسم کی، آچماغا کؤنول لر مُلکونی،
اولا گلشنده ریاحین خیلینه سردار گل.
آدم ایسن باغ سیرین ائیله بو موسمده کیم،
باغی رنگ و بوی ایله قیلدی بهشت آثار گل.
چارسوی باغ سیرانی بو گون مرغوب دیر
کیم، شکوفه اوندا صراف اولدی و عطار گل.
چیخمیش ایکن بزم گلشندن یئنه عود ائیله‌ییب،
جام می آندیردی اهل توبه یه تکرار گل.
حبس دن یوسف چیخیب سلطان مصر اولموش کیمی،
اولدو، آچیب غنچه سین آرایش گلزار گل.
سان زولیخا خلوتی دیر غنچۀ دربسته کیم،
چیخدی اوندان دامن چاکیله یوسف وار گل.
چاک اولوب بولموش صفا باد سحردن ساناسان،
باددیر جبریل و قلب احمد مختار گل.
شبنم گلزار رخسار رسول الله دیر،
نشر عطریله قیلیر هردم اونا اشعار گل.
دُر شبنم ساچدی رنگین برگ لردن هر طرف،
لّعل خندان ائتدی خوبلار کیمی گوهربار گل.
صورت حالینه حیران ائیله‌دی عاقل لری،
آچدی عرفان اهلینه گنجینۀ اسرار گل.
سبزه اوزره گزدیریر باد صبا گل برگینی،
سانکی سبزه آسمان دیر، کوکب سیار گل.
قیلدی پنهان غنچه نین لُعب ایله گؤزدن حوققا سین،
بولماق اولماز هیچ رنگ ایله، زهی عیار گل!
یوز چئویرمیش خاردن آیریلماق ایستر بی سبب
منعم ناکس کیمی اصلیندن ائیلر عار گل.
خار غیرت نولا گر سانجیلسا گلبن باغرینا،
آیریلیب اوندان اولور هم صحبت اغیار گل.
یئریدیر اودلارا یانسا حسرت ایله خار کیم،
اوندان آلیر زیب و زینت، غیره اولور یار گل.
بیوفالیق عادتین توتموش اونونچون دور بو کیم،
عمردن اولماز جاهان باغیندا برخوردار گل.
قانغی بلبل قانی دوتموش بیلمزم کیم، متصل
گه اسیر خار اولور، گه مبتلای نار گل.
سیر باغ ائتدیم سحر، گؤردوم آچیب مجموعه سین،
حفظ ائدیب بو مطلعی ائیلردی استحضار گل