منو
کی، چراغ ایله بولونماز اثر ظلمت غم
یئنه آچیلدی گل و قیلدی جهانی خرم،
چمن آرای وجود اولدی گل باغ عدم.
مژدۀ لاله و گل وئردی مگر باد بهار
کی، نثار ائتدی شکوفه اونا دینار و درم.
لاله بیر رنگ ایله کشف ائیله‌دی اسرار درون
کی، دل خاکده قالمادی رموز مبهم.
شمع گل وئردی چمن بزمینه بیر نور و سرور
کی، چراغ ایله بولونماز اثر ظلمت غم.
باددن غنچه لره حامله اولدی گلبن
اؤیله کیم، عیسی یا جبریل دمیندن مریم.
دم جان بخشینی گویا یئله وئرمیش عیسی
کی، بولور جان و تن اشجار دمیندن هر دم.
دم بو دم دیر، بو دمی خوش گؤره گؤر، ای عارف،
آنما عیسی دمینی، اورما کئچن دمدن دم!
سبزه خیز اولدی هوادن اؤلولر توپراغی،
سبزه هر لوح مزاره بو خطی قیلدی رقم:
کی، نیچون غفلت ایله فوت اولا بیر موسم کیم،
اولا اوندان دیری لر تک اؤلولر هم خرم.
خاک جم اوزره چیخیب لاله، دوتوب جامینی دئر
کی: کیمین وار ایسه بیر جامی، بو گون اولدیر جم.
آدمی ایسته سه توپراقدا، البته، بولور
بو گون اول فیضی کی، توپراغی ائدیب دیر آدم.
سبزه دن رنگ عیان ائیله‌دی آینۀ باغ
بس کی، چکدی دون و گون شبنم باراندان نم.
طُرفه کیم، سبزه ایله رونق باغ اولدی زیاد،
گرچی هر آینه دن رنگ صفا ائیله‌دی کم.
بلبله منت ائدیب دون دئر ایدی باد بهار
کی: منم واسطۀ رونق ملک عالم.
دئدی بلبل اونا: ای اهل خلاف، ائیله‌مه لاف!
بیر حیا قیل، بو سؤزو سؤیلمه، اَبْسَم، اَبْسَم!
سن اگر بیلمز ایسن، جملۀ آفاق بیلیر
کی، کیمین دیر بو مبارک اثر فیض قدم.
تازه گلزار وزارتده آچیلمیش بیر گل،
وئرمیش آفاقه نسیم اثری لطف اِرَم.
قیلمیش اوندان بو صفا کسبینی گلزار وجود،
اولموش اونونلا بو بنیاد لطافتی محکم.
اول سرافراز کیم، اونون کیمی بیر فرّخ رُخ
پایۀ قدره قدم باسمادی اوندان اقدم.
اوندان آلدی عظمت امر وزارت، گویا
حکم ایچون شیمدی سلیمانه وئریلدی خاتم.
اونا ختم اولدی ره و رسم حکومت، گویا
شیمدی نسب اولدی بو درگاهه وزیر اعظم.
حسن رآییله بو گون حکمه گیرر دیو و پری،
ضرب تیغیله بو گون فتح اولور اقلیم عجم،
کی، سلیمان زمان آصفی ائتدی نایب،
اولدی سرعسکر کیخسرو دوران رستم.
اول جاوانبخت کی، اجرای عدالتده مدام،
نسق شرع ایله دیر امر شریفی توام.
پرتو رحمت حق حضرت رستم پاشا
سر ارباب سخا، سرور پاکیزه شیم.
گر صبادن خبر عدلین ائشیتسه، ائده مز
شمع پروانه یه مطلق دیری اولدیقجا ستم.
ملک نظمینده اگر حکمونه اولسا واقف،
زلف محبوبی هوا ائیله یه بیلمز درهم.
اعتدال ایسته سه ارکان مزاجه ادلی،
ایریشور صحت عام ایله اطبایه الم.
فیض نصرت بولور، البته، جاهانگیرلیگه
همتی هر کیمه خورشیدصفت وئرسه علم.
صفحۀ نامه کیمی جزم دوتار هر یئره کیم،
کلک وش چکسه سطور سپه و خیل و حشم.
رفعت قدرینی خورشیده سئوال ائتدی زمین،
خاک درگاهینه یاد ائیله‌دی خورشید قسم
کیم، اونون بولماییب احوالینا بیر ذره وقوف،
قالمیشام دایرۀ حیرت ایچینده من هم.
طاعت خالقه دیر حسن رضاسی داعی،
رزق مخلوقه کف بحر نوالی مقسم.
بحر و کان ائیله سه‌لر دعوی احسان و سخا،
کرم و جودینی گؤردوکده اولورلار ملزم.
قانی اول رتبه کی، جودیله اونون بحث ائده بحر،
قانی اول حوصله کیم، کان کرمدن اورا دم.
هر نه تدریج ایله مین ایلده وئره بحرۀ کان،
هر نه یوز ایلده مرورایله اولور حاصل یم،
بذل بیر دمده ائدر مجلسینه خازن جود،
صرف بیر گونده قیلیر بزمینه قسّام کرم.
بالله ار گؤرموش اولایدی کرم بی بدلین،
اونو معجز سانیب ایمانه گلیردی حاتم.
سرورا، جملۀ آفاقه یئتیرمیش عدلین
وسعت اوزره اثر رابطۀ خان نعم.
نولا گر دار شفای کرمیندن یئتسه
بو فضولی دلفگارینه هم بیر مرهم.
وار امیدیم کی، جاهان اولمایا خالی سندن،
نئجه کیم، وار نجوم و فلک و لوح و قلم،
شغل عالم اولا تدبیرین ایله راست مدام،
قدّ گردون اولا پابوسین ایچون دایم خم.