توتیای چشم ایچون هر صبح دن یوللار توتوب

عاشق اولموش حسنونه، ای سرو خوشرفتار، گل،
چاک چاک ائتمیش سنینچون سینۀ افگار گل.
گل نه نسبت دیر سنه، سندن اونا یوز فرق وار،
سن بت پرده نشین سن، شاهد بازار گل.
اؤیله پنهان ائیله‌میش کؤکسونده سرّ عشقینی
کیم، آیاغیندان آسارلار ائیله مز اقرار گل.
توتیای چشم ایچون هر صبح دن یوللار توتوب،
خاک درگاهین صبادن ائیلر استفسار گل.
سیر گلزار ائتدیگین پیک صبادان فهم ائدیب،
گنج زر قیلمیش مهیا، قیلماغا ایثار گل.
برگ گل سانمان کی، رنگین خشت لر جمع ائیله‌میش،
چکمه یه اول گنج زر حفظینه بیر دیوار گل.
تا سریر سبزه یی تپرتمه یه تحریک باد،
سایه سیندن اوردو هر لوحینه بیر مسمار گل.
هر سحر گلزار لوحینده چکر یوز دایره،
غالباً منقار بلبلدن آلیر پرگار گل.
ایش ایچون گلشن شبستانین منور قیلماغا،
هر آغاج دان آسدی بیر قندیل پر انوار گل.
بونجا قندیلی فروزان ائیله دی، امّا نه سود،
دود دلدن قیلدی بلبل روزگارین تار گل.
دار دنیایی فضای جنّته دؤندردی، لیک
غنچه کیمی بلبله دنیایی قیلدی دار گل.
بیر زبان حال دیر هر یاپراغی فهم ائتسه لر،
پرده دار خاک اولانلاردان وئریر اخبار گل.
بلبل زار ائتدیگی فریادلر تأثیری دیر،
بی سبب خواب عدمدن اولمامیش بیدار گل.
باغبان، سلطان عادل دؤورودور، تنبیه قیل،
اورماسین گلزاره آتش، ظلم ائدیب زنهار گل!
جور ایله غنچه نین پیراهنین چاک ائتمه سین،
جنبش نامعتدلدن قیلسین استغفار گل.
یوخسا ناگه صورت حالی اولور سلطانه عرض،
قهره اوغرار مقتضای وضع ناهموار گل.
اول گل باغ خلافت کیم، بهار دولتی
عالم افروز اولالی گؤرمز جفای خار گل.
اولدی دورونده هوا محبوس زندان حباب،
غالباً گؤرموش هوادن شمه ای آزار گل.
برگ گل گزدیرمز اولدی محمل باد صبا،
حدی یوخ کیم، چکدیره باد صبایه بار گل.
صرصر قهر جهان سوزوندان آگاه اولالی،
آچماز اولدی بوستان فتنۀ اشرار گل.
خلوت لطفونه دیر نور دل مؤمن چراغ،
گلشن قهرینه دیر داغ دل کفار گل.
شاه دین سلطان سلیمان سعادتمند کیم،
کسب ائدر خلق خوشوندان نزهت اطوار گل.
باشه سالمیش مهرینی روز ازلدن چرخ پیر،
اؤیله کیم، گلرخ لر ائیلر زینت دستار گل.
انقلاب دؤوردن بولمازدی هرگز اختلال،
آلسا اوندان حکمونه فرمان استمرار گل.
ذوق بازاریندا بولمازدی بو رنگ ایله رواج،
ائتمه سه یدی نقش مهرون سکۀ دینار گل.
اولماق ایچون مطرب بزمی، دوتوب بیر دایره
اؤیره نیر هر صبح بلبل دن فن ادوار گل.
مطبخ جودینه کیم، دودینه سنبل دور غلام،
خارکشلیک صنعتین توتموش، دئگیل بیکار گل.
قورتولور فتح ائتدیگی کشور بلای فتنه دن
کیم، آچیلدیقدا تیکاندان آیریلیر ناچار گل.
شرح ائدیب سوسن لره اوصاف خلقون، گزدیریر
غنچه دن هر صبح آچیب گلشنده یوزطومار گل.
قطرۀ شبنم میدیر، یا ال آچیب سایل کیمی،
خازن لطفوندن آلمیش لؤلؤی شهوار گل؟
قویماییب دؤورونده ویران کارگاه گلبنی،
بیر آیاغ اوزره دوروب اولموش اونا معمار گل.
عدلی ایامیندا شبنم سانمانیز کیم، بلبلون
آقچاسین قوینوندا حفظ ائتمیش اولوب غمخوار گل.
دامن پاکیله اول بهجت فزای ملک دور،
گر جاهان باغیندا جنّت گل لریندن وار گل.
وضع عالمدن فلک مقصود اولدی کیم، اولور
بسله مکدن خاری منظور اولوالابصار گل.
قدرینه وئرمز خلل دنیایه قیلماق التفات،
زیب و زینت وئردیگیچون خاره اولماز خار گل.
میوه اول سلطان عادل دیر نهال دولته،
سابقاً گلمیش سلاطین فلک مقدار گل.
نولا گر سابق لر اولدیسه فنا، اولدیر غرض،
میوه گؤستردیکده تؤکمک رسم دیر اشجار گل.
قیل، فضولی، مدحین اول شاهین کی، باغ مدحی نین
بلبلی اولوردو، بولسا قدرت گفتار گل.
گرچی یوخدور اعتبارین، مدحین ائت اظهار کیم،
عادت دؤور زمان دیر خاره وئرمک بار گل.
وار امیدیم نئجه کیم رسم مدار دهردیر،
ایلده بیر گز عالمه عرض ائیله مک دیدار گل.
فتح باغیندان اونا هر دم خلاف باغ دهر،
تازه – تازه آچا لطف ایزد جبار گل.