یئتر هر لحظه منیم کؤنلومه سندن غملر

دئدیم: ای قلبیمه هر دم وئرن آزار غمین،
خم ائدیب قامت موزونومی بار ستمین.
یئتر هر لحظه منیم کؤنلومه سندن غملر،
نه قدر تاب قیلیم جورونه، بیتمز ستمین.
بیر زامانلار منه لطفون وار ایدی، اولموش ایدی
منیم آغلار گؤزومون سورمه سی خاک قدمین.
نه خطا چیخدی الیمدن، نه گناهیم وار کیم،
منی – بیچاره نی ترک ائیله‌دی لطفون، کرمین؟
بوندان آرتیق منه جور ائیله‌مه کی، بیتابم،
تنده یوخدور او توان کی، چکه بار المین.

دئدی: بیز دلبریک، آختارما محبت بیزدن،
یئرینی بیل سؤزونون، ائتمه شکایت بیزدن.