سۆنبول ساچین گۆل یۆزونه چۆنکیم نیقاب اولور، شها،
پۆنهان اولان گؤزون اول دم شول آفیتاب اولور، شها،
لعلو-لبی-یاقوتونا جان نئجه تشنه اولماسین،
چۆن کیم آنین هر قطرهسی دۆرّی-خوشاب اولور، شها.
یۆزونه زؤهره، مۆشتری، مئهر ایله ماه اؤگونمهسین،
که-اول گۆنشین بیر ذرّهسی مین ماهتاب اولور، شها.
مئهرینله کینهن اودونو جانیم ایچینده یاخالی،
عینالیقین یئرین یۆزو عینیمدن آب اولور، شها.
اول دم کی، سن نوش ائدهسن جامی-صفایی جم کیمی،
لعلینه جام ائردوگونه باغریم کباب اولور، شها.
نذر ائتدوگون بیر بوسهیی درویش ایچون ائتسن ادا،
واللاهی کیم، آندان سانا مین-مین ثواب اولور، شها.
لعلوندورور ائحیا ائدن هر دم او بیجیسمی، ولی،
سرخوش گؤزوندن سایرو جان مستی-خراب اولور، شها،
آبی-زۆلالی-وصلینه شول رسمه تشنهدیر بو جان،
کیم گؤزلریمه بو جهان عینی-سراب اولور، شها.
باغریم قانینی گؤزلرین هر دم، حبیبی، تؤکدوگو،
بودور کی، رنگین آب ایله اول خوش خیضاب اولور، شها.