گلیرم گینه…

گلیرم گینه ایزین آختاریب قاپی آغزینا قارا اوز قویام
ایزینین توزون داوادیر دییه اگیلیب یئره یارا اوز قویام
قووالانمیشام گئده بیلمیرم، بئله بیر خطا ائده‌بیلمیرم
نه سایاقدی قاعده بیلمیرم، نه بیلیم گئدیب هارا اوز قویام
باش آلیب گئدن قایدیر گلیر او گئدیش نه‌دیر بو گلیش نه‌دیر
منی سارسیدیر دارالان فیکیر باش آلیب گئدم دارا اوز قویام
آلیشیر جانیم نیه بیلمیرم، کیمه وورغونام دییه بیلمیرم
گینه توز دونون گئیه بیلمیرم، سویونور جانیم یارا اۆز قویام
بو نه جذبه‌دیر منه یول وئریر اینامیمدا بیر داوام ایله‌نیر
منه منده بیر ینی من دئیر دوزه‌لیب دوز ایلقارا اوز قویام
او جناب‌دان ال اوزه بیلمیرم ایکی غربته دؤزه بیلمیرم
یول اوزاقدی تبریزه بیلمیرم گئدیرم او دربارا اۆز قویام
دئسه گئت سحر یالان اهلی سن یالان عالمه دالان اهلی سن
سؤزو غربته سالان اهلی‌سن، قارا اۆزله اقرارا اۆز قویام