گیلئیلیک داشلانیر یاش تک گوزومدن گؤرمیهن سنسن
پریشان سوورولور ساچ تک خیالیم هؤرمیهن سنسن
قارانلیق یوکلو کروانلاردا ایتدیم ذرّه تک سنسیز
بو مجهولی گونش درگاهینا سوردورمیهن سنسن
الیمدن اختیاریم اونداکی آتدین منی، گئتدی
یار ائتدین آیریلیق هنگامهسین، اؤلدورمیهن سنسن
بیتیب مین بیر دیلک ذوق وصالیندا اورکلردن
تومورجوق شکلیدیر یئر-گؤی گلیب گولدورمیهن سنسن
آلیشمیشدیر اورکده بیر قرارسیزلیق خیالیندان
الولار باش قویوب رسوالیغا سۆندورمیهن سنسن
گلن داشلار منی توشلار دمادم طعنه شکلینده
سحر مشهور بازار جنوندور، گؤرمیهن سنسن