شراب وصل ایچنلرچون یقین خمیازهسیز یول وار
بو غوغادن اوزاق گیزلینده بیر آوازهسیز یول وار
دلالت دوستاقیندان چیخمیشام چوخداندی مجنون تک
جنون صحراسینا قلبیمده بیر دروازهسیز یول وار
یول اوستون کسدیریبلر یول کسنلر کیم بودور قایدا
جانیمدا قایدا توتماز عشق اوچون شیرازهسیز یول وار
عنان عشقینه ال چاتماق اولسا یول یاخین یولدور
دلالت اهلینه آددیم دا بیر اندازهسیز یول وار
سحر دنیا اؤزو یولدور گئدیر هر کیمسه اؤز قدرین
نهدیر های کوی سالیبسان وصله بیر شیرازهسیز یول وار