حئیران خانیم

حئیران خانیم ۱۸-جی عصرین سوْنلاریندا ناخچیواندا دوْغولموش، تحصیل آلمیش و عرب و فارس دیللرینی، کلاسیک آذربایجان و فارس ادبیاتینی اؤیرنمیشدیر.۱۹-جو عصرین اوّللرینده رۇسیا-ایران توْققوشمالاری دؤورونده چوخلو ناخچیوانلیلار ایله بیرلیکده اوْنون دا عائله‌سی ناخچیواندان ایرانا کؤچورولموشدور. ۱۹-جو عصرین ۶۰-جؽ ایللرینده تبریزده وفات ائتمیشدیر. فۆضولی ادبی مکتبی‌نین داوامچیلاریندان، کلاسیک آذربایجان شعری‌نین تانینمیش گؤستریجی‌لریندندیر.
تورکجه و فارسجادا، اساساً، سئوگی شعرلری یازمیشدیر. رۇدکی، عزالدین حسن اوغلو، سعدی شیرازی، حافیظ شیرازی، عمادالدین نسیمی،علیشیر نوایی، محمّد فضولی، قوسی تبریزی و باشقا شاعیرلره نظیره‌لری وار. حئیران خانیم عروضون هیجا وزنینه یاخین بحرلرینده، ساده خالق دیلینده یازمیشدیر و اونون بعضی شعرلری شیفاهی خالق ادبیاتی نۆمونه‌لرینه یاخیندیر. اثرلری‌نین ۳ ال‌یازماسی (باکی، تهران و تیفلیس نۆسخه‌لری) معلومدور؛ بۇنلاردان ان مۆکملی شاعیره‌نین اؤز تاپشیریغی ایلا یازیلمیش باکی نۆسخه‌سیدیر. بو نۆسخه آذربایجان جومهوریتی‌نین ال‌یازمالار اینستیتوسوندا ساخلانیلیر.