ای اودلو شهپریله ساچان زهر-اینتیقام!
ای حرب الهی! ای سؽریتان کینلی اژداها!
اولدونسا بونجا قهر و فلاکتله شادکام،
آرتیق بیتیر شو صحنهیی، ای مۆفتریص دها!
ائندیر شو قانلی پردهیی، ای رهنومای-شر!
ائندیر ده بیر قدر نفس آلسین بنی-بشر.
سارمیش بۆتون جیهانی هیاهوی-دهشتین:
یالنیز بشرمی پنجهی-قهرینده سارسیلان؟
حاکیم هاوادا، یئرده، سو آلتیندا وحشتین،
وحشیلرین ده ظۆلمدن اولماقدا باغری قان.
قاپلانلار ایضطیراب ایله هر آن دیلر آمان،
قارتاللار ایشته ائتمهده هپ ترک-آشیان.
ای شیدّت و غضب ساووران حامی-ظفر!
آرتیق یئتر، اوساندی جیهان، سن ده بیر اوسان!
ترک ائت شو قانلی تورپاغی، آرتیق چکیل، یئتر!
هر کس دیدیشمهدن یورولوب شیمدی روح آچان
آزاده بیر هاوادا چیچکلنمک ایستیور،
پک تاتلی بیر اۆمیدله ایلنمک ایستیور.
شرّ اولمادیقجا خئیره قاووشماق محال اولور.
قسوتلی، سیسلی هر گئجهدن بیر گۆنش دوغار.
حۆرّیت اؤیله نازلی بیر آفت کی، پک وقور،
قان آقمادیقجا کیمسهیه گۆلمز او عیشوهکار.
ذاتاً بو، کؤهنه یوردوموزون کؤهنه عادتی،
هر تانرینین قان ایچمگه وار حۆسن-رغبتی.
ظۆلمت داغیلدی، ظۆلم و فساد اولدو پاییمال،
هر یئرده سانکی حاق و عدالت گۆلومسویور.
آل بایراغین قاناتلاری آلتیندا، پۆرمعال
هر چؤهره، هر دوداق ساچییور لمعه-لمعه نور.
حۆرّیت؟ آه، او بنجه فقط تاتلی بیر خیال...
دۆنیادا وارمی حۆرّ عجابا؟ ایشته بیر سوال!..