اویویور... جامهخوابی توز، تورپاق؛
نه بیر اۆمّیدی وار، نه کیمسهسی وار.
او بیر اؤکسوز، او بیر سولوق یارپاق؛
نه ده محزون کؤکوس کئچیرمهسی وار.
اونا یولدان کئچنلرین اۆرگی
داش کسیلمیش ده یاسدیق اولموشدور.
یوخ اونون ایمدی کیمسهدن دیلگی؛
اویویور... بینوا یورولموشدور.
گۆنشین قؽزغین، اودلو ضربهسینه
هدف اولموش وۆجودو؛ هم ده علیل...
بیر کیچیک قۆلبه یوخ کی، کؤلگهسینه
ایلتیجا ائیلهسین زاواللی سفیل!
ظۆلم و فیسقین، جینایتین یولونو
سدّ اۆچون حبسخانالار یاپیلیر.
ایمدی معصوم ایکن، سفالت اونو
مۆجریم اعلان ائدر، یارین آسیلیر.
حاقا وارماق، پرستیش ائتمک اۆچون
اوجالیر بیر طرفده معبدلر.
داش، چامور، حاق رضاسی نامومکون...
آلدانیر، آلدانیر زاواللی بشر.