من نه ایدیم؟
شرقین ازیلمیش قادینی!
(بیر آز سۆکوت...)
من نه ایدیم؟ اوف، اونو هئچ سورمایینیز!
وارلیغیم بیر قورو هئچ!
کئچمیشین ان قابا، ان ویجدانسیز،
کیرلی دؽرناقلاری قهر ائتدی منی.
گؤرمهدیم گۆن ایشیغی؛
دوغدوغوم گۆندن — اوت — تاریخین
پاسلی زنجیرلری اینلتدی منی.
هر طرفدن قارا بیر مؤوهومات
پردهلر چکدی همن گؤزلریمه...
قوپاریرکن فریاد،
ائتدی قانون ایله دین ایستهزا
منیم اؤکسوزجه قؽریق سؤزلریمه.
یوخ، یالان سؤیلهدیم، آلدانمایینیز؛
واردی بیر چوخ تاپینانلار دا مانا
چۆنکی پک دیلبر ایدیم،
سۆسلو کاشانهلرین قوینوندا،
منی سارمیشدی ایپکلر، تۆللر...
آغلاییردیم گۆلهرک،
آلیشیب محبسه، آلتون قفسه،
سؤندوروردوم قابا شهوتلری من...
«پک گؤزلسن» — قانایچن سولطانلار
منی ایلنجه یاپار،
چوخ زامانلار دا باغیشلار بیرینه،
«ان نفیس عیشوهلی بیر قۆّه» — دئیه.
اوه، نه میسکینجه حیات!؟
یئری گلدیکجه آتارلار نیله،
یاخود آتشکدهیه...
دویغوسوز تانرییا قوربان اولاراق،
کۆل اولوردوم یاناراق، قؽوریلاراق.
داها دهشتلی بلا، — چیرکین ایسن، —
آتاجاقلار درحال
بیر چوخور، بیر قویویا، بیر کانالا.
یاپسالار هر قابالیق، آلچاقلیق،
باش ایردیم سوساراق اوف دئمهدن...
بیر زامانلار من، اوت، بیر هئچ ایدیم،
قیسمتیم سیلله، دایاق، کؤنلوم اسیر،
بیر بؤجکدن ده حقیر.
ایمدی لاکین او تیکنلردن اوزاق —
گۆلهرک، اوینایاراق،
یاشاماق ذؤقونو دویماقداییم آنجاق، آنجاق...
یوخ، من آرتیق سۆرونن هئچ دئییلیم،
پارچالانمیش دا قارانلیقدان هؤرولموش
کفنیم،
گمیریلمز بئینیم.
ایشته ان شانلی اۆفوقلرده اوچان
شرقین آزاده، گۆلر بیر قؽزییام؛
اوجا حشمتلی فضالاردان آشان
پنبه بیر یؽلدیزییام!..