دۆن و بو گۆن

دۆن سعادتله پارلایان گؤزلر،
شیمدی یأس و کدر نیثار ائیلر.
دۆن تهوّورله گۆرله‌ین سؤزلر،
شیمدی بیر باشقا ماجرا سؤیلر.
دۆنکو خندان کؤنول بو گۆن سؽزلار،
دۆن سؤنن بیر عمل بو گۆن پارلار.

مرحمتسیزدیر ایشته کؤهنه فلک،
بشریتله ایلنیر دایم.
بشریتله ایلنیر گۆله‌رک...
دۆنکو محکوم اولور بو گۆن حاکیم،
دۆنکو بدبخت اولور بو گۆن مسعود،
دۆنکو مسعود اولور بو گۆن مردود.

باشقا، پک باشقا شیمدی ذئوق-جیهان،
دۆنکو پئیمانه‌لرده قان جوشویور.
دۆنکو معموره‌لر بو گۆن ویران،
دۆنکو ویرانه‌لر بو گۆن معمور...
هپ پوزولموش دا دۆنکو پئیمانلار،
یئنی دوست اولموش اسکی دۆشمانلار.

یوق طبیعتده اؤیله بیر قوّت،
ابدی، هم ده پایدار اولسون.
هپ دییشمکده‌دیر بۆتون خیلقت،
هپ دییشمکده‌دیر حیات و فۆنون.
اولمایان وارمی اینقیلابه زبون؟
وارمی سارسیلماز اؤیله بیر قانون؟!

سئیر ائدین ایشته کایناتی بۆتون،
دئوریلیر هر آدیمدا بیر عظمت،
دینله‌مز دۆنکو حادیثاتی بو گۆن،
پارلییور هر دقیقه بیر حیکمت.
هر قارانلیقدا چؽرپینیر بیر نور،
هر حقیقتده بیر خیال اویویور.