اویویور

اسمه، دور! اسمه، ای نسیم-باهار!
اویویور، یار-عیشوه‌کار اویویور.
دالغالاندیقجا زۆلف-زرّین تار،
سارییور پنبه حۆسنو آلتین نور.
او گؤزل چؤهره‌نین اسیری ایکن،
عجابا، قؽسقانیرمیسان بن‌دن؟!

اسمه، بیر دور! بؽراق، بؽراق اویوسون
نئوباهارین شو نازنین قؽزینی.
اؤتوشن قوشلار! ایشته سیز ده سوسون!
سوسون آرتیق! شو زؤهره یؽلدیزینی
سئیر ائدین ایشتیاق و حسرت ایله،
بو گؤزل لئوحه سونرا دۆشمز اله.

بو چیچکلیکده، سیز امین اولونوز،
بؤیله بیر گۆل یئتیشمه‌میش اصلا.
کیم بیلیر، دۆشسه جنّته یولونوز،
بولونور بلکه بؤیله بیر سیما،
بولونور بلکه بؤیله بیر آفت!
او دا شایان-شۆبهه‌دیر، البت...

گۆنش! ای خیلقتین گؤزل گلینی!
اویویور ایشته نازلی همشیره‌ن!
سن ده دور! ساچما بیر ضیالرینی،
سن ده بیر آن ایچین چکیل، گیزلن!
بیر آز ایلن بولوتلو دۆنیاده،
مانع اولما بو طیفل-نئوزاده.

بستر-نازی هپ چیچکلردیر،
اوخشایور ایشته گۆل یاناقلارینی.
یئشیل اوتلار اؤپر دقیقه‌ده بیر
پنبه، تومبول، لطیف آیاقلارینی.
آخیشیب ان کۆچوک سولار خندان،
نیننی سؤیلر او شوخ ایچین هر آن.

اویویور... بیخبر شو ولوله‌دار،
شو صفاسیز، وفاسیز عالمدن.
اویویور... باق نه خوش، گۆلر یۆزو وار،
شاشیریر شۆبهه‌سیز بو حالی گؤرن.
شیمدی رؤیاده کیم بیلیر، بو ملک،
هانکی عالمده اَیلنیر گۆله‌رک.

اویویور... پک سئویملی، پک معصوم،
بیر چوجوق روحو وار شو فیطرتده.
هله راست گلمه‌میش بو طالع-شوم
بؤیله بیر نازنینه خیلقتده.
حۆسن-مۆطلق ائنرسه یئر یۆزونه،
قونار آنجاق بونون گۆلر اۆزونه.

اویویور... اوف! ای بلالی کؤنول،
چؽرپینیب دورما! سن ده سوس آرتیق،
وورما، سوس! ایشته سوسدو هم بۆلبول.
دور، حیاتیم دا گئتسه، دور آزاجیق،
اویویور چۆنکی آشینای-خیال،
اویویور چۆنکی غایه‌ی-آمال...