وئردیم او گۆن کی، زۆلف-پریشانه کؤنلومو
وئردیم او گۆن کی، زۆلف-پریشانه کؤنلومو،
سالدی نیگار او زۆلفده زیندانه کؤنلومو.
یالواردیم عجزینن اونا، بلکه خیلاص ائده،
زنجیر-زۆلفه باغلادی دیوانه کؤنلومو.
هر قدر اویدوم اول بۆت-ترسا جمالینه،
یاندیردی شمع-حۆسنه چۆ پروانه کؤنلومو.
گۆلزار-حۆسنه یوسیف-دیل چؽخدی سئیر ائده،
سالدی او یار چاه-زنخدانه کؤنلومو.
ائتدیکجه من محبّت او کافر بالاسینا،
ائتدی جفای-ناز ایله ویرانه کؤنلومو.
وصله یئتیرمهییب، گئجه-گۆندوز فراقده،
تبدیل ائدیبدی لالهصیفت قانا کؤنلومو.
بزم-وۆصاله حسرت-اۆمّیدوار ایدیم،
سالدی بلای-فیرقته مستانه کؤنلومو.
گۆلچین بینوا ایدیم، اولدوم مۆرید-شئیخ،
یاندیرمیشام من آتش-هیجرانه کؤنلومو.