آچین آققیشقالاری

آچین آققیشقالاری
هاوالار تك اوره گیم دولقون دور
قورویان داغلارا یاغماق دیله ییر
سئل اولوب ظالیم اویون یخماقا آخماق دیله ییر
ایلدیریم تک گئجه باغرین یارا شاخماق دیله ییر
گونه باخماق دیله ییر 

آچین آققیشقالاری
منه یوخ، قفس غمده قناریلره بیررحم ایله یین
بیر گولون سولماسینا سولمامیشام
قلبیمین دولماسینا دولمامیشام
قورخورام توستو چالا گول خانانی 
آچین آققیشقالاری

آچین آققیشقالاری
بیر گُوروم اولكم آرا بیرله ­شن ائللر نئجه اولوب
كوچه لره یوموروق توسپورو بایراق اولان اللر نئجه اولوب
بیزیم ائللر نئجه اولوب 
آچین آققیشقالاری

آچین آققیشقالاری
بو نه ائودورکی  ایشیقلیق یولو یوخدور
بیلمیرم قبله م هایاندیر؟ ائویومون ساق سولو یوخدور
بیرینی بغض دوتوبدور دانیشانمیر
بیری بیر شئردی دوشوب دار قفس ایچره چالیشانمیر
آنا ایستكلی بالایلان باریشانمیر
قول بویونلا ساریشانمیر
ایکی توپراق قاریشانمیر
آچین آققیشقالاری

آچین آققیشقالاری
ائله بیل كی قولاغا وای سسی گلدی
قاراباغدان اوغول ای  وای سسی گلدی
یا گوره ن قانلی بئشیک اوخشورو؟ لای لای سسی گلدی
نه گئدیر سس نه گلیر های
اولدو کال کلمه لر اوسته امه ­گیم زای
وای یاساق دیللی ائلیم وای
وای یاساق دیللی ائلیم وای 
آچین آققیشقالاری
آچین آققیشقالاری