صفاسی گولون

اگرچی خوشدو منه عطری، هم صفاسی گولون،
جفاسی چوخدو، نه حاصیل کی، یوخ وفاسی گولون.

جفای خاری گؤروب، کؤچدو باغیدن بولبول،
گؤره ن کیم اولدو بو گولشنده آشناسی گولون؟

خزانه میل ائله دی، آلمادی وفا نظره،
یئتیشدی بولبوله چوخ – چوخ غم و جفاسی گولون.

تؤکور سیریشک عوضینده گؤزوم اوزه آل قان،
اولوبدو، چونکی کؤنول زار و مبتلاسی گولون.

یازیلسا نقطه به نقطه، دئییلسه حرف به حرف،
قورتارماز حشره قدر حال ماجراسی گولون.

عذار آلینه باخدیقجا قان اولور دیللر،
ایلاهی، حقدن آشیب موحنت بلاسی گولون.

خطا یولونا دوشوب، بولبوله جفا قیلدی،
خطایه سالدی اؤزون عاقبت، خطاسی گولون.

جاهاندا ذرّه قدر اولماز، ای کؤنول، خندان،
کی، خون بولبول اگر اولماسا غذاسی گولون.

توتاردی، خون جیگردن اولایدی گر سیراب،
گونش تک هر طرفی، ناتوان، ضیاسی گولون.