افسوس!

کئچیبدی موسم گول، گئتدی نوباهار، افسوس!
قالیبدی بولبول بیچاره خوار و زار، افسوس!

ریاض عزّ و شرافتده بیر گول آچمیشدی،
قوپاردی اول گولو گول چین روزیگار، افسوس!

او گول کی، غبطه ائدردی اونا بهشت چمن،
توتوبدو ایندی یئر آلتیندا او قرار، افسوس!

او گول بدن کی، ایپک کوینک اینجیدردی اونو،
اولوبدور ایندی او، توپراقلا خاکسار، افسوس!

سن آللاه، ای قارا توپراق، اونو عزیز ساخلا!
اودور منیم گؤزومون نوری، ای مزار، افسوس!

او تزه آی هله بدر اولمامیش تامام و کامال،
باتیردی اول آیی بو چرخ روزیگار، افسوس!

او پاک اولان اوجا گؤیلرده بورج و خورشیددن،
پاریلدادی اوجا بیر اولدوز، اولدو تار، افسوس!