نه اوچون گلمز؟

قویوبدور انتظاریندا، نه اوچون گلمز، نه اوچون گلمز؟
همیشه آه و زاریندا، نه اوچون گلمز، نه اوچون گلمز؟

اوزولدوم کاروانیمدان، ال اوزودوم خانیمانیمدان،
فلک اینجیر فغانیمدان، نه اوچون گلمز، نه اوچون گلمز؟

گئدیبدیرقافله سالار، اولوبدور گؤزلریم خونبار،
نه یر یار و، نه بیر غمخوار، نه اوچون گلمز، نه اوچون گلمز؟

کؤندولده آه و زاریم وار، نه صبر و نه قراریم وار،
دئمز بیر دیفکاریم وار، نه اوچون گلمز، نه اوچون گلمز؟

او زولف نرگیس مسته کؤنول چوخداندی پابسته،
منی هیجران ائدیب خسته، نه اوچون گلمز، نه اوچون گلمز؟

سر کویین گزر کؤنلوم، گول رویین سئور کؤنلوم،
وصالین چون دیلر کؤنلوم، نه اوچون گلمز، نه اوچون گلمز؟

آلیب دیر جانیمی هیجران، اولوبدور گؤزلریم گریان،
او مهوش، نارنین جانان، نه اوچون گلمز، نه اوچون گلمز؟

منه هیجران مشقت دیر، فراغین درد و موحنت دیر،
نیگاریم خیلی موددت دیر، نه اوچون گلمز، نه اوچون گلمز؟

عزیزیم، گؤز یاشیم قاندیر، ایشیم فریاد و افغاندیر،
او یاریم هاردا مهماندیر، نه اوچون گلمز، نه اوچون گلمز؟

یانار جانیم فراغیندان، توتار کؤنلوم سوراغیندان،
کی، چیخسین یار اوطاغیندان، نه اوچون گلمز، نه اوچون گلمز؟

الیمده اختیاریم یوخ، گئدیب صبر و قرایم یوخ،
یانیمدا گول عذاریم یوخ، نه اوچون گلمز، نه اوچون گلمز؟

صبا، او مه لیقا دیلبر، آلیبدیر جانیمی یکسر،
کؤنول آنجاق اونو ایستر، نه اوچون گلمز، نه اوچون گلمز؟

یئتیبدیر عرش اوزه دادیم، توتوب دونیانی فریادیم،
منیم اول سرو آزادیم نه اوچون گلمز، نه اوچون گلمز؟

قالیبدیر ناتوان نالان، گئجه گوندوز اولار گریان،
اونون یوخ دردینه درمان، نه اوچون گلمز، نه اوچون گلمز؟