دیلنچی

سرت، سویوق بیر قؽش گئجه‌سی... سما بیاض، یئر بیاض،
اوغولدایان کۆلکلرله سارسیلمادا سوقاقلار.
هر کیمین کی، قانادی وار چووغون اولسا داریلماز،
فقط یئنه بو سویوقدان قؽسیلمادا سوقاقلار.

گلن ده وار، گئدن ده وار، من ده وارام بو گئجه،
طبیعتین دهشتلری تیتردیور اطرافی.
بیر بوجاقدا یورغون تیترک اللریله کمنچه
چالان ضعیف بیر ایختیار اینلدیور اطرافی.

یانیندا بیر یاوروسو وار، یورولمادان چالییور.
کامانچانین سیملریندن قوپان یانیق هاوالار
اینجلدیکجه، هر کس اوندان آجی بیر حظّ آلییور.

یئللر دخی ولوله‌لی اؤتویورکن بو یولدان،
یاواش-یاواش سسلرینی دییشدیریب بیر قادار،
اونلار دخی اوزاقلاردا، آغلییورلار کؤنولدن.

– ای ایختیار، سن ای ظالیم، مظلوم دولو ایللرین
اۆرکلره کدر ساچان، الَم وئرن تؤحفه‌سی!
آجی دولو، عذاب دولو، ظۆلوم دولو ایللرین
مرحمتسیز فؽرچالارلا قارالانمیش لؤحه‌سی!

سنین آرتیق واختین اؤتموش،
سنی دؤران صفیل ائتمیش.
فقط اونو، او سئویملی قؽزجیغازی،
اولما راضی،
قؽش دوندورسون، گۆنش یاخسین.
بوراخ اونون اللرینی،
بوراخ اونون هؤرولمه‌میش تئللرینی.
قوی بوراخسین
اوخودوغو یانیق، خسته هاوالاری.
بوراخ، باری
چاغلییورکن یوردوموزدا یاشاییشین سئللری،
بلکه اؤپسون گؤزلرینی سعادتین یئللری.