بیر لؤوحه

ایشته سکسن یاشیندا بئلی بۆکوک بیر قادین
آیلار، ایللر بیلمه‌دن قؽرمیش قولون، قانادین.
زامان چکمیش جانینا گؤزلری‌نین نورونو،
عؤمرو آلمیش الیندن قلبی‌نین سۆرورونو.

وۆجودونون سون باهار یارپاغیندان فرقی یوخ،
دوداغیندا بیر گۆلوش، بیر قاینایان شرقی یوخ.
چؤهره‌سینده پریشان بولودلارین وار عکسی،
اللرینده سرینلیک – بیر مزار هدیّه‌سی.

اممیش اوزون ایللرین باهارینی، قؽشینی،
مجلیسلرین بولونموش نشئه‌سینده، غمینده.
بۆروموش ان نهایت کؤلگه‌لر باخیشینی،
ایندی گزر خیالی مزارلیق عالمینده.

او یئنه یاشاماقدان بؽقمامیش، اوسانمامیش،
او یورغون، او ضیاسیز، او قۆّه‌سیز، او قامیش
وۆجودیله یئنه ده عؤمور سۆرمک ایستیور،
«آه نه اولور بیر آز دا گؤزلریم گؤرسه!..» دیور.

ای هنوز گنجلیگینین دملرینی یاشی‌یان،
قلبینده گور دالغالی چاغلایانلار داشی‌یان،
او سکسن یاشلی قادین یاشاماق ایستیورکن
بیلمم نیچین حیاتدان اوزاقلاشماداسین سن؟