بو طیفل کی، نوری-بصر و شیرهیی-جاندیر،
تابی تن و آرامی-دیل و روحی-رواندیر،
مین زحمت ایله بسلهدیگین تازه جواندیر،
گؤندرمه بونو مکتبه، رحم ائیله، آماندیر!
قوی کۆچهده ناز ایله خورام ائیلهسین اوغلون!
اؤز خوشلادیغی امره قیام ائیلهسین اوغلون!
بو بۆلبولی-شوریده کی، پاکیزه نفسدیر،
آلودهیی-غم ائتمه کی بیهوده هوسدیر،
بونجا کی، گئدیب مکتبه، بیلدیکلری بسدیر،
مکتبدیر آدی، لئیک حقیقتده قفسدیر؛
قویما او داغیلمیشدا مقام ائیلهسین اوغلون!
صبحون بئله ویرانهده شام ائیلهسین اوغلون!
مکتبده گئدیب درس اوخویانلاری گؤرورسن،
نیطقی چکیلن تازه جوانلاری گؤرورسن،
قطعاً قورویوب جیسمده قانلاری گؤرورسن،
عاریفسن، اؤزون یاخشی-یامانلاری گؤرورسن،
قؽیما کی، گئدیب فیکرینی خام ائیلهسین اوغلون!
عؤمرون غمی-علم ایله تمام ائیلهسین اوغلون!
باور ائدهمم علمدن اولسون فرح عاید،
علم آرتیق اولورسا، هم اولور غم مۆتزاید،
ایسترسن اگر اوغلون ائده کسب فواید،
هم ثروتی زاید اولا، هم میکنتی زاید،
ترغیب ائله تا کسبی-حرام ائیلهسین اوغلون!
بیر آد چؽخاریب شؤهرتی-تام ائیلهسین اوغلون!
بیچاره کیشی، قانماغا باشین هله کئیدیر،
آخیر منه بیر سؤیله گؤروم، علم نه شئیدیر؟
بیلمک نه گرک کیم، بو «الیف»دیر، بو دا «بئی»دیر؟
«هووز»، سورا «حۆطّی»، بو نه «هئی»دیر، او نه «حئی»دیر؟
قوی پول قازانیب، صدری مقام ائیلهسین اوغلون!
بگ خانلار ایله دخل-کلام ائیلهسین اوغلون!
«گوپ-گوپ» کیمی بیفایده اهلی-قلم اولما،
اول «باشی قاپازلی»، ولی «بی درد و غم» اولما،
«قؽزدیرمالی» اول، تشنلب و دیدنم اولما،
مولّا «موزالان»لارا اویوش، مؤحترم اولما،
قوی «هوپ-هوپ» اولوب، شؤهرتی-تام ائیلهسین اوغلون!
کسبین بوراخیب، شئعره دعوام ائیلهسین اوغلون!
اؽلک دفعه «مولّا نصرالدّین» ژورنالیندا (8 سئنتیابر، ۱۹۰۶، № 23) «هوپ-هوپ» ایمضاسی ایله چاپ اولونموشدور.
ج.محمّدقولوزادهنین «نیه من درسدن قاچدیم؟» آدلی فئلیئتونو، صابیرین «اول گۆل کی، سنه خالیق ائدر لۆطف بیر اؤولاد» و «بیلمم نه گؤروبدور بیزیم اوغلان اوخوماقدان» میصراعلاری ایله باشلانان شئعرلری «مولّا نصرالدّین» ژورنالیندا (19، 26 مای و 16 ایون، ۱۹۰۶، № 7، 8 و 11) چاپ ائدیلندن سونرا «حیات» قزئتینین ۱۹۰۶-جؽ ایل 25 آوقوست تاریخلی ۱۹۰-جؽ نؤمرهسینده «گوپ-گوپ» ایمضاسی ایله همین اثرلره هم نثر، هم ده نظم ایله جاواب وئریلمیشدیر. صابیر «حیاتین گوپ-گوپونا جاواب» آدلی شئعرینی محض بو مۆناسیبتله یازمیشدیر.
ژورنالدا صابیرین شئعریندن اوّل «حیات»اؽن «گوپ-گوپونا» جاواب («حیات»، № ۱۹۰) آدلی بیر فئلیئتون دا چاپ اولونموشدور.