قوجالیقدان شیکایت

افسوس قوجالدیم، آغاجیم دۆشدو الیمدن،
سد حئیف جوانلیق!

ضعف ائیله‌دی عاجیز منی، قالدیم عملیمدن،
چکدیم نه زیانلیق!

سالدیقجا جوانلیقدا کئچن گۆنلری یاده
دردیم اولور اون قات!

یا رب، یئترم بیرده‌می دۆنیاده موراده؟
هئیهات و هئیهات!

ساققال آغاریب، بئل بۆکولوب، دینمه، فیلانی!
اؤوقاتیم اولوب تلخ؛

عؤورت ده یاخیر ساققالیما گۆنده حنانی،
«ریشی کی، به رنگ الخ...»

یاد اولسون او گۆنلر کی، مورادیمجا گزردیم
سازنده اوروغنان؛

مین عاجیز و بیچاره‌لرین باشین ازردیم
سیلله، یوموروغنان،

بو سایه‌ده هر لحظه ائدیب سعی و تلاشی،
ثروت قازاناردیم؛

تحصیل ائله‌ییب قول گۆجونه امری-معاشی،
دؤولت قازاناردیم.

اعضالر ایسه سۆست اولوب ایمدی قوجالیقدان،
بیر دادرسیم یوخ!

گؤرمزمیسن احوالیمی، دۆشدوم اوجالیقدان،
فریادرسیم یوخ؛
هئچ یئرده سسیم یوخ،
کسکین نفسیم یوخ،
فیکریمدی جوانلیق،
باشقا هوسیم یوخ!..


اؽلک دفعه «مولّا نصرالدّین» ژورنالیندا (23 ایون، ۱۹۰۶، № 12) «هوپ-هوپ» ایمضاسی ایله چاپ اولونموشدور.