دۆشدو بۆتون قزئتلر قیمتدن، آی جان، آی جان!....
خالقین جانی قورتاردی تهمتدن، آی جان، آی جان!....
قؽل یایماییردی اصلا ظالملارین گؤزوندن،
رۆسوای ایدیک جهاندا ملعونلارین سؤزوندن،
آخ، آخ! نه یاخشی اولدو، ایش دۆشدو اؤز-اؤزوندن،
اللشممیش قوتاردیق زحمتدن، آی جان، آی جان!....
دۆشدو بۆتون قزئتلر قیمتدن، آی جان، آی جان!....
بادی-صبا، آپار وئر، موللا قواما مۆژده،
یازسین، دئ، لنکراندا موللا سلاما مۆژده،
سؤیله، او دا یئتیرسین جمله عواما مۆژده؛
دۆشدو بۆتون قزئتلر قیمتدن، آی جان، آی جان!....
مونبرده رقصه گلسین بئهجتدن، آی جان، آی جان!....
عرض ائت بشارت ایله قافقازداکی وجوده:
ژورنال، قزئت قاپاندی، دورما، یؽخیل سجوده،
هر نه بیلیرسن ائیله غیبتده، رۆبروده،
یازماز دخی یازانلار بدعتدن، آی جان، آی جان!....
دۆشدو بۆتون قزئتلر قیمتدن، آی جان، آی جان!....
گئت قۆببهیه سلام ائت موللا حاجی بابایه،
سؤیله توتولدو جومله ژورنال، قزئت وبایه،
مؤمن مۆریدلر ایله دور قوش صدا-صدایه،
امّتلرین یؽغیلسین هر کتدن، آی جان، آی جان!....
دۆشدو بۆتون قزئتلر قیمتدن، آی جان، آی جان!....
یاتدی قزئت یازانلار، فرصت دخی سیزیندیر،
قارشیدا وار اوروجلوق، صحبت دخی سیزیندیر،
مسجیدده منبر اوزره لعنت دخی سیزیندیر،
آیریلمایین اؤلونجه لعنتدن، آی جان، آی جان!....
دۆشدو بۆتون قزئتلر قیمتدن، آی جان، آی جان!....