یوخدور علاج، سؤیلهدی، درد-جهالته
ساقی، بئش-اون پیاله گتیر بو جماعته،
تغییر وئر بو حالتی بیر باشقا حالته!
سیل سینهی-کدورتین ابنای-میلّتین،
تبدیل قؽل عداوتی مهر و محبّته.
فرسوده قلب اۆچون اؤلوری روحی میلّتین،
بیر تازه قۆّه ائیله عطا روح-میلّته.
بیر باده ایله رفع ائله خالقین کسالتین،
بلکه گله جماعت-ایسلام غئیرته!
هر مملکت جماعتی سئومزسه بیر-بیرین،
قارداش کیمی یئتیشمز او میلّت سعادته.
ساقی، عجب زمانهده گلدیک جهانه بیز،
حسرت قالیب تمام جاهان ایستیراحته.
قؽرخ آی تامام اولدو گیریفتار-مؤحنتایک،
اینسان نئجه داوام ائلهیر بو مۆصیبته؟
باشلاندی حرب[1]، بیر-بیرینه ووردو عالمی،
باغلاندی یول، قاریشدی کدورت کدورته.
اهل-شبوسترین یاریسی قالدی بیپناه،
اونلار کی، تیکمیش ایدی گؤزون راه-غۆربته.
روسیه مالینین بیره اون آرتدی قیمتی،
وئردیک کیلیمی کؤینگه، تومانه، چرقطه.
قند ایله چای خئیلی ضرر ووردو بیزلره،
ائتدی فقیر ایچنلری، لعنت بو عادته!
خالقین یوخ ایدی بیرجه چؤرکدن شیکایتی،
آخیر او دا گتیردی بو خالقی شیکایته.
رحمت کسیلدی اۆچ یۆز اوتوز بئشده[2]، بالتّمام
اود ووردو قحط-آب تاماماً زیراعته.
یاددان چؽخارتدی قحط-غلا هر مۆصیبتی،
مخلوق ایتیردی ال-آیاغین، دۆشدو وحشته.
دریای-احتیاجده باشلاندی فؽرتینا،
وارلی اؤزون آپاردی کنار-سلامته،
نان-عزیز خار و ذلیل ائتدی یوخسولو،
واعیظ دلالت ائیلهدی خالقی اینابته.
فۆرصتدن ایستیفاده ائدن بوغدا تاجیری،
هر گۆن علاوه ائیلهدی بیر قدر قیمته.
دؤولتلیلر آپاردی زکاتین قؽزیللارین،
وئردی عبایه، جۆبّهیه، زنجیره، ساعته.
آچ دیدهی-بصیرتووی، ائیله بیر نظر
بازار باشیندا او محل-رذالته.
گؤر بیر نه ذیلّت ایله شبوستر خانیملاری
صف-صف دوروب چؤرکچی دۆکانیندا نؤوبته.
اوغلو، اری سفرده، یولو باغلی، قارنی آج
الله، اؤزون حیمایت ائله بؤیله عؤورته!
آچ بیر گؤزونو، شیعه، نظر قؽل خانیملارا،
اونلار کی، دۆشوبلر بو نؤعی ظۆلم و ذیلّته.
ای بوغداسی ائوینده اولان بیحیا کیشی،
خالقی معطّل ائتمه، اؤزون سالما غئیبته!
هر گۆن گلیب چؤرکچی دۆکانیندا بکلیسن،
وجهی نهدیر قویورسان اؤزونکون قناعته؟
گلمیر الیندن ائیلهیهسن خالقا یاخشیلیق،
باری فنالیق ائیلهمه ابنای-میلّته!
مۆشتاقسان اگر آلاسان باغ-جنّتی،
ای مالدار، واختیدی، باشلا تیجارته!
آچ کیسهی-سخاوتووون بندین، ای غنی،
لاقئید باخما، بذل ائله اهل-ویلایته!
تعمیر قؽل شیکسته کؤنوللر عیمارتین،
ای مین تۆمن فدا ائیلهین بیر عیمارته!
وئر بیر ناهار خرجووو شامسیز یاتانلارا،
الله دۆشورمهسین سنی فقر و فلاکته!
دۆشمز اله همیشه بئله فۆرصت، ای عمو،
احسان ائدین، وئرین، تلسین ایستیعانته.
یاده سالین سویوقدا یاتان بینوالری،
مشغول اولاندا پینج کناریندا صؤحبته.
بیر باغ ولیم تاپاممیری بیچاره یاندیرا،
مؤحتاجدیر اؤزو و عیالی حرارته.
سندن فقیر ایستهمیری جۆمله دؤولتین،
بیر مۆختصر کؤمکلیک ائله اهل-حاجته.
اون مین تۆمنلی اوندا-بیرین ائیلهسه فدا،
شئیطانه اویما، باتمایاجاقدیر پولون سنین،
تئز ختم اولور بو معرکه، چکمز قیامته.
تسبیحی قوی کنارا، اؤزون یورما، شئیخنا،
اللهین احتیاجی نهدیر بو عیبادته؟
وئر بیر قارین چؤرک آپاریم اهل-بئیتیمه،
اولسون سبب ریضایت-فخر-ریسالته.
رحم ائیلهمز قوهوم قوهوما، قونشو قونشویا،
تبدیل اولوبدو رحم و مۆروّت قساوته.
امّا شبوستر اهلی اؤز اهلین آراشمیری.
یوخدور باخان فقیره، یئتیمان عؤورته.
اهل-وطن قالیبدی یامان گۆنده، ای عمو،
ای اللی مین تۆمنلی، توف اولسون او دؤولته!
قارس اهلینی نه طؤور ایله باکی جماعتی
بسلیر اۆچ ایلدی، سیز ده گلین بیر حمیّته!
یوللارلا زحمت ایله اوزاق بیر مسافهیه
پول و غذا و البسه مینلرجه کۆلفته.
اونلار وئریلله مۆفت-مۆسلّم بو پوللاری،
امّا بیزیمکیلرده باخین بیر قساوته.
کیبر و غۆرور ایله دایانیب تکیهگاهینا،
بورج ایستهینده یوخسولو باشلار ملامته.
اونلار وئریلله مۆفت و لاکین بیزیمکیلر
وئرمیلله بورج مۆعامیلهسیله رعیّته.
ای اۆمّت-محمّده رحم ائتمهین کیشی،
نار اهلیسن، گۆونمه نماز و طهارته!
دین قارداشین عیالی محلّهنده آج یاتیر،
ویزر و وبالی بوینوما، گئتمه زیارته.
دؤور و برینده اللی نفر مۆستحق وار،
زوّار اولور ایمامه، باخین بیر حماقته....
بزم-عزاده باشه وورار، های-هوی ائدر،
رؤونق وئریر، دئییلله، فیلانکس شریعته.
گؤز یاشی، های هوی دویورماز قارینلاری،
اون شاهی وئر فقیره، وئره هفدیرم اته.
دؤولتلینین غمینده دئییل یاغدی-یارمادی،
امّا تیکیب فقیر گؤزون آب-رحمته.
اونلار ائدیب تداروک اۆچ ایللیک ذخیرهسین،
مشغولدولا بوخاری کناریندا عیشرته.
امّا فقیریلر سویوق ائولرده تیتریری.
نیفرین ائدرله دمبهدم ارباب-ثروته.
باخدی طبیب مؤعجوزه، ترپتدی باشینی:
- یوخدور علاج، سؤیلهدی، درد-جهالته!
[1]-بیرینجی دۆنیا مۆحاریبهسینه ایشارهدیر
[2]-۱۳۳۵ هیجری-۱۹۱۸-جی میلادی ایل