مریض-عشقه، ای دیلبر، طبیب-مهریبان ایستر،
علیل-دردی هیجرانم، کؤنول آرام-جان ایستر،
دهانین قؤنچهی-پۆسته، آچیلسا، کؤنلو شاد ائیلر،
بو رؤشندیر کی، یار یارین همیشه شادیمان ایستر.
لبین سؤیلر کی: من قندم! او قنده من ده خواهندم،
نه تنها من سنه بندم، سنی جۆمله جاهان ایستر.
جمال-گۆل عۆذاریندن اگیل بیر گۆل دریم، جانا.
نیگارین گؤرمهیه عاشیق الینده ارمغان ایستر.
جهاندا یوخدو مانندین، میثال-زۆلف-دیلبندین،
او رفتار-خوشایندین گؤرنلر هر زامان ایستر.
همیشه آریزوکشدیر جمالین سئیرینه دیده،
و لاکین گؤزلرین گؤرجک اونو تیر و کمان ایستر.
مۆژهن بیر اوخ وئریب قویدو کمانه، گؤزلرین آتدی،
اۆرکدن عاشیقی دلدی؛ اولوب تسلیم، آمان ایستر.
دئدیم: چاه-زنخدانین نه قدری طولی وار، سؤیله؟
دئدی: عاشیق، جۆنون اولما، محبّت ایمتحان ایستر!
الینده دستهی-نانه وئررسن مؤعجوزه، یا نه؟
گئدیرسن تک گۆلوستانه، یانیندا پاسیبان ایستر.
بویون سرو-خۆرامان تک چکیلمیش سمت-افلاکه،
اوتور، بیر بوسه لۆطف ائیله، ایاقدا نردووان ایستر.