من

کاش همدم اولایدیم گۆلشنده خار ایلن من،
عئیش و نشاط ائده‌یدیم دایم باهار ایلن من.

بو مملکتده اولمور تکلیفلر مۆعیّن،
اولسایدی، یار اولاردیم بیر گۆل‌عۆذار ایله من.

بیر یاندا آه و ناله، بیر یاندا مئی، پیاله،
گه یاریلن انیسم، گه آه و زاریلن من.

چکمز گئنه یاخامدان ال نووحه‌خان-ظالیم،
ائیله‌سم ده قطع-اۆلفت لئیل و ناهار ایلن من.

آغزین بو یانه توتما بیهوده، ای مۆنادی،
دورمام یئریمدن ایلّا، آواز تار ایلن من.

قؽللام نماز-صۆبحی با صد ریکوع و سجده
مئیخانه‌دن چؽخاندا سرخوش نیگار ایلن من.

پروانه یاندی، معجز نار-ویصاله جهلاً،
عیلّت اودور کی، اولدوم همفیکر هزار ایلن من.