میرزا شفیع واضح تبریزی

لیریک شعریله اوروپادا مشهور اولان میرزا شفیع ‎۱٩‏-جو یوز ایلین بیرینجی یاریسیندا یاشامیشدیر. ۱۸-جی یوز ایلین سونلاریندا گنجه‌ده آنادان اولموشدور. آتاسی كربلائی صادق گنجه‌نین سون حاکیمی جواد خانین معماری‌ ایدی. میرزا بیر مودّت جواد خانین قیزی پُسته‌خانیمین مولک‌لرینی ایداره ائتمگه مأمور اولموش آنجاق روس - ایران موحاریبه‌سی باشلاندیقدان سونرا بو وظیفه‌دن آیریلمیش و خطاطلیق و موعلیم‌لیکله مشغول اولموشدور. ۱۸۳۲-جی میلادی ایلده میرزا فتحعلی آخوندوفا نستعلیق یازیسینی تعلیم وئرمیش و عینی زاماندا اونا عیرفانی مسئله‌لری ده آشیلامیشدی. ۱۸۴۰ دا تفلیسه كؤچموش و اورادا فارس دیلی موعلیمی اولموشدو. تفلیسده واختینی داها چوخ عیرفان ییغینجاقلاریندا گئچیرن شاعیر «دیوان حکمت» آدلی ادبی مجلیس تشکیل ائدرک شاگیردلرینی و حتی باكیخانوفو اورایا جلب ائدیر. بو محفیلده عومومیتله شرق کلاسیک‌لریندن سئچیلمیش پارچالارلا میرزانین و باكیخانوفون شعرلری اوخونور و ادبی موباحیثه‌لر اولوردو. بو زامان تفلیس ده اولان هانوورلی فریدریخ بوندشتدت شاعیردن فارسجا و توركجه‌نی اؤیرنیركن اونون ان گؤزل شعرلرینی دفتره یازمیش و آلمانا دؤندوکدن سونرا اونلاری آلمانجایا ترجمه ائدرک ۱۸۵۰ ده «شرقده مین بیر گون» آدلی اثرینده چاپ ائتمیشدی، ۱۸۵۱ ده ده برلین شهرینده میرزا شفیع‌نین «شرقی لری»آدیله بیر كیتابچا نشر ائتدیرمیشدی. بو شعرلر میرزا شفیعه اوروپادا بؤیوک بیر شهرت قازاندیردی. ‌بو حادیثه‌دن سونرا بوندشتدت سونراکی نشرلرده اؤزونو شعرلرین مؤلیفی اعلان ائتدی.