خوبلار آریغیندان یاریماق اولماز

خوبلار آریغیندان یاریماق اولماز،
ایگیدین همدمی گرک چاغ اولا.
بسته بویلو گرک، مینا گردنلی،
زۆلفی سیاه، وار اندامی آغ اولا.

سحر دورا سۆرمه چکه گؤزونه،
بیرچکلرین حلقه قویا اۆزونه،
جیلوه‌لنه، سؽغال وئره اؤزونه،
ایشی، گۆجو گۆلوب-اویناماق اولا.

دؤشون آچیب، ال دینده یاخیا،
آغ گۆلون باغرینا پئیکان توخویا،
بدنیندن مۆشک و عنبر قوخویا،
زۆلفو گردنینده بیر قوجاق اولا.

بیر مایابود گرک، بالدیری یوغون،
سراسر ات باسا دیزین، توپوغون،
ال دَینده دورا بوغون‌بابوغون
تیتره‌یه، قویروقدان چوخ یومشاق اولا.

حیاسی اۆزونده، عقلی باشیندا،
اؤلدوره واقیفی گؤزو قاشیندا،
یا اون اۆچ، یا اون دؤرد، اون بئش یاشیندا،
نه اوندان بؤیوکرک، نه اوشاق اولا.