دوروبان عشقیله گۆذار ائیلهدیم
دوروبان عشقیله گۆذار ائیلهدیم،
بیر پرینین اولدوم مهمان ائوینده.
ذرّهجه گؤرمهدیم حؤرمت، عیزّتین،
قالدیم ائله، پئشمان-پئشمان ائوینده.
تا کی، منی گؤردو اول قلبی قارا،
چکدی یاشماغینی او گۆل رۆخسارا،
دؤندردی اۆزونو، توتدو دیوارا،
ساناسان کی، یوخدور اینسان ائوینده.
دوداغی شکردیر، گؤفتاری شربت،
نه فایدا، ائیلهمز شیرین محبّت.
مخلصی کی، یوخدور اوندا بیر لذّت،
بولدور ائله آجی قلیان ائوینده.
کئچمه او دیلبرین سن اوتاغیندان،
تر بنفشه قوخار هر بوجاغیندان،
سانکی بیر گوشهدیر جنّت باغیندان،
آچیلیبدیر گۆل-الوان ائوینده.
واقیف، بیر کیمسه کی، بیزدن یاشینا،
یقین بیل کی، بیزلن اولماز آشینا،
گلدیگیمیز هئچ گلمهدی خوشونا،
تاپدیم من حالینی عۆرفان ائوینده.